Carmelo Abela jappoġġja t-tħassib tan-nies dwar il-proġett f'Ħaż Żabbar

Id-Deputat Laburista u eks ministru Carmelo Abela jgħid li s-sejħa tal-poplu trid tinstema’ fuq dar tal-anzjani kontroversjali ta’ ħames sulari fil-qalba ta’ Ħaż-Żabbar.

F’post fuq Facebook il-Ħamis, Abela qal li jidher ċar li r-residenti ta' Ħaż-Żabbar mhumiex kuntenti b’dan l-iżvilupp u huma mħassba dwar l-impatt li jista’ jkollu.

“Il-kura tal-anzjani hija settur li dan il-gvern eċċella fih, bħalma għamel f’ħafna oqsma oħra, iżda din il-ħidma tista’ tkompli mingħajr ma tiġi sagrifikata l-karattru u l-bilanċ tal-lokalitajiet tagħna,” qal.

Abela żied jgħid li għandu jittieħed kont tat-tħassib tan-nies biex l-awtoritajiet ikunu jistgħu jsibu soluzzjoni li tirrispetta l-bżonnijiet soċjali u s-sostenibbiltà.

Il-kummenti tiegħu jiġu qabel protesta skedata għat-Tnejn 8 ta’ Diċembru kontra l-iżvilupp ta’ ħames sulari. Il-protesta qed titmexxa mill-kunsill lokali ta’ Ħaż-Żabbar u l-Moviment Graffitti.

Is-Sindku ta’ Ħaż-Żabbar Jorge Grech qal li l-kunsill iħoss li dan l-iżvilupp se jagħmel ħsara kbira lill-karattru tal-lokalità u lill-kwalità tal-ħajja tar-residenti.