Il-prezzijiet tal-biljetti tal-ajru għal titjiriet fl-Ewropa jistgħu jiżdiedu sa 20% matul l-2027, hekk kif il-linji tal-ajru qed jiffaċċjaw spejjeż dejjem ogħla għall-fjuwil.
Din it-twissija saret mill-Kap Eżekuttiv ta’ Ryanair, Michael O’Leary, waqt intervista ma’ Euronews, fejn spjega li ż-żieda fil-prezzijiet taż-żejt mistennija tħalli impatt dirett fuq l-ispejjeż tal-kumpaniji tal-ajru.
O’Leary qal li diversi linji tal-ajru bħalissa qed jibbenefikaw minn ftehimiet li permezz tagħhom kienu ffissaw il-prezzijiet tal-fjuwil minn qabel.
Madankollu, ħafna minn dawn il-ftehimiet mistennija jiskadu fl-ewwel xhur tal-2027, u dan jista’ jfisser li l-kumpaniji jkollhom jixtru l-fjuwil bi prezzijiet eqreb lejn dawk tas-suq internazzjonali.
Il-prezz tal-fjuwil ta’ Ryanair jista’ jirdoppja sa April
Skont O’Leary, Ryanair kienet assigurat prezz ta’ $67 kull barmil għall-fjuwil matul l-2026 permezz ta’ ftehimiet li jipproteġuha minn żidiet fis-suq.
Iżda l-Kap Eżekuttiv wissa li dan il-prezz jista’ saħansitra jirdoppja sa April tas-sena d-dieħla.
Żieda daqshekk qawwija fl-ispejjeż tal-fjuwil tista’ ġġiegħel lil-linji tal-ajru jgħollu l-prezzijiet tal-biljetti biex jagħmlu tajjeb għall-ispejjeż addizzjonali.
O’Leary għalhekk qed iwissi li l-passiġġieri Ewropej jistgħu jiffaċċjaw żidiet sostanzjali fil-prezzijiet tat-titjiriet matul l-2027.
Il-kunflitt fl-Iran qed iżid il-pressjoni fuq il-prezzijiet taż-żejt
Il-prezzijiet internazzjonali taż-żejt kienu bdew jonqsu gradwalment wara li laħqu madwar $120 kull barmil fi żmien l-invażjoni Russa tal-Ukrajna fl-2022.
Madankollu, il-gwerra tal-Istati Uniti fl-Iran wasslet għal żieda qawwija fil-prezzijiet, li f’punt minnhom laħqu madwar $110 kull barmil.
Wara tnaqqis gradwali minn Marzu, il-prezzijiet reġgħu bdew jogħlew hekk kif il-kunflitt kompla jitwal.
Bħalissa, skont ir-rapport, il-prezz taż-żejt jinsab qrib il-$100 kull barmil.
Din l-instabbiltà fis-suq internazzjonali tal-enerġija qed toħloq aktar inċertezza għal-linji tal-ajru, li l-fjuwil jirrappreżenta parti importanti mill-ispejjeż operattivi tagħhom.
Żidiet fil-biljetti jistgħu jolqtu t-turiżmu Malti
It-twissija ta’ Ryanair tista’ tkun ta’ tħassib għas-settur turistiku Malti, partikolarment minħabba d-dipendenza tal-pajjiż fuq it-titjiriet li jgħaqqdu lil Malta ma’ destinazzjonijiet Ewropej.
Skont ċifri tal-Bank Ċentrali ta’ Malta, aktar minn nofs it-turisti li żaru l-pajjiż fl-2025 kienu ġejjin minn pajjiżi Ewropej.
Għaldaqstant, żieda fil-prezzijiet tal-biljetti tal-ajru tista’ tagħmel il-vjaġġi lejn Malta aktar għaljin għal parti sostanzjali mill-viżitaturi.
Madankollu, għadu mhux ċar kemm eventwali żidiet fil-prezzijiet jistgħu jaffettwaw id-domanda għat-titjiriet jew in-numru ta’ turisti li jagħżlu lil Malta.
Pressjoni wkoll fuq is-sussidji tal-enerġija f’Malta
Iż-żieda fil-prezzijiet internazzjonali taż-żejt qed tqajjem ukoll mistoqsijiet dwar kemm il-Gvern Malti jista’ jkompli jsostni n-nefqa fuq is-sussidji tal-enerġija u l-fjuwil.
Din is-sena, in-nefqa fuq dawn is-sussidji mistennija tilħaq €400 miljun, hekk kif il-Gvern qed ikompli jżomm il-prezzijiet lokali stabbli minkejja l-varjazzjonijiet fis-swieq internazzjonali.
Mill-2022 ’l hawn, Malta nefqet madwar €1.35 biljun f’sussidji biex ittaffi l-impatt taż-żieda fil-prezzijiet tal-enerġija fuq il-familji u n-negozji.
Iż-żieda fil-prezz taż-żejt għalhekk qed iżżid il-pressjoni fuq il-finanzi pubbliċi, filwaqt li l-Gvern qed jipprepara biex jippreżenta l-Budget 2027.
