Waqt li kienet qed tindirizza konferenza tal-aħbarijiet Is-Supretendent tas-Saħħa Pubblika Charmaine Gauci ħabbret 20 każ ġdid ta' Covid-19 fl-aħħar 24 siegħa għal total ta' 370 każ.
B'kollox saru 1,288 swabs għal total ta' 16,016-il swab sa issa.
Wieħed mill-każi kien l-anzjan li miet u li tħabbret il-mewt tiegħu dalgħodu.
10 każi huma immigranti fiċ-ċentru miftuħ ta' Ħal Far fejn l-immigranti jinsabu fi kwarantina wara li kien jidher illi l-virus qed jinxtered f'dan iċ-ċentru. Dawn issa ġew iżolati mill-bqija tal-immigranti.
Gauci tfakkar illi meta jkollok firxa fil-komunità iktar hemm ċans li jinfirex il-virus, għalkemm falkkret ukoll illi l-Gvern ħa miżuri biex jilqa' għal dan permezz ta' kwarantina għaċ-ċentru kollu.
Intant il-każi l-oħra jinkludu mara Albaniża residenti Għawdex u li taħdem bħala cleaner fl-Isptar Ġenerali ta' Għawdex, mara Għawdxija li hija carer fl-istess sptar u li ma kelliex sintomi, mara Maltija ta' 42 sena li hija carer fl-Isptar Karin Grech, mara Maltija oħra ta' 32 sena li hija wkoll carer imma taħdem fil-komunità.
Mara Maltija ta' 63 sena, raġel Malti ta' 61 sena u tfajla li marret tixtri minn ħanut fejn diġa kien hemm każ - kollha rriżultaw fil-pożittiv. Sfortunatament din tal-aħħar marret tara lil xi ħadd li jiġi minnha u li hija anzjana u li issa qed tiġi ttestjata.
Fl-aħħar nett raġel li mar fl-istess ħanut li marret it-tfajla u hawn ukoll dan kellu kuntatt ma' ħafna nies, inkluż ħbieb li mar għandhom. F'dan il-każ iżda s-sintomi baqgħu jiġu u jmorru għal kważi xahar, sakemm iggravaw din il-ġimgħa.
.jpeg)
