Jitlef il-kontroll tal-karozza u jidħol ġo sigra

Dalgħodu għall-ħabta tas-7:15, seħħ inċident tat-traffiku fi Triq Ħal Luqa, Raħal Ġdid, meta raġel ta’ 28 sena minn Ħaż-Żabbar li kien qiegħed isuq vettura tat-tip Nissan Sunny, għal xi raġuni tilef il-kontroll u baqa’ dieħel ġo siġra.

Fl-istess vettura kien hemm ukoll mara ta’ 44 sena bħala passiġġiera.

Fuq il-post ġew minnufiħ imsejjħa l-Pulizija, flimkien ma’ ambulanza li ħadet liż-żewġ persuni l-Isptar Mater Dei għal aktar kura.

Iktar tard ix-xufier ġie ċċertifikat li qed isofri minn ġrieħi ħfief, filwaqt li l-passiġġiera qed issofri minn ġrieħi gravi.

L-investigazzjonijiet tal-Pulizija tad-distrett għadhom għaddejjin.