Cassola jniedi l-kampanja elettorali tiegħu, appoġġat minn għaxar personalitajiet

Il-Ħamis, Arnold Cassola nieda l-kampanja tiegħu għall-elezzjonijiet għall-Parlament Ewropew, bħala kandidat Indipendent.

Cassola ppreżenta l-manifest politiku tiegħu, li huwa mibni madwar erba’ temi ewlenin: l-importanza ta’ ambjent nadif, il-ħtieġa assoluta ta’ governanza tajba, il-bini ta’ soċjetà ħanina u ġusta u ħidma lejn futur ta’ tama għaż-żgħażagħ Maltin. Mill-ġimgħa d-dieħla l-manifest ikun aċċessibbli fuq is-sit www.arnoldcassola.eu .

Il-kampanja ta’ Arnold Cassola hija appoġġjata minn bosta sostenituri, inkluż għaxar personalitajiet Maltin. Dawn jinkludu l-atleti Fabio Spiteri u Elena Borg, l-artisti Debbie Caruana Dingli u Steve Bonello, l-edukaturi Michelle Attard Tonna u Claire Azzopardi Lane, il-kittieb Immanuel Mifsud, l-ekonomista Marie Briguglio, l-avukata ambjentali Claire Bonello u l-kirurgu u opinjonista Kevin Cassar.

“Filwaqt li nistieden lill-votanti dubbjużi biex ikunu protagonisti fit-tiswir tal-futur tal-Ewropa, ta’ pajjiżna u tagħhom stess billi jmorru jitfgħu l-vot tagħhom, b’umiltà npoġġi l-esperjenza politika tiegħi ta’ 35 sena, kemm fuq livell Malti kif ukoll fuq dak tal-UE, għad-dispożizzjoni tal-Maltin kollha u tar-residenti tal-UE li jridu jaħdmu biex l-Ewropa u Malta jkunu aktar demokratiċi, trasparenti u eqreb lejn dak kollu li jolqot liċ-ċittadini,” Cassola stqarr waqt it-tnedija.