'Hemm bżonn dibattitu miftuħ dwar l-abort' - L-MEP Alfred Sant

L-Ewroparlamentari Laburista Alfred Sant esprima l-appoġġ tiegħu għall-prinċipji sostnuti fir-rapport Matić dwar is-sitwazzjoni tas-saħħa sesswali u riproduttiva u d-drittijiet relatati fl-UE, fil-qafas tas-saħħa tan-nisa, u ddikjara li hemm bżonn dibattitu miftuħ dwar l-abort. Huwa żied jgħid li l-ipproġettar ta’ nies li huma favur l-abort bħala bla qalb jew amorali ma’ jagħmel l-ebda sens u huwa atteġġjament ipokrita.

F’intervent fis-sessjoni plenarja tal-Parlament Ewropew, Alfred Sant qal li d-drittijiet inaljenabbli tan-nisa kollha għall-integrità tal-ġisem u t-teħid ta’ deċiżjonijiet awtonomi għandhom ikunu rikonoxxuti universalment.

"Minn punt ta' tluq bħal dan, id-dilemmi kumplessi li jqajmu kwistjonijiet dwar l-abort għandhom jiġu solvuti mill-komunitajiet wara dibattitu miftuħ u tolleranti".

“Id-dibattitu għandu jirrispetta n-normi kulturali u ta’ mġieba prevalenti iżda ma jħallihomx jegħlbu d-drittijiet inaljenabbli. Għandu jitwettaq fuq bażi nazzjonali. L-UE għandu jkollha ftit li xejn x’tgħid f'tali kwistjonijiet u huwa għalhekk li astjenejt fuq il-vot finali ".

“Malta implimentat l-iktar bidliet radikali favur id-drittijiet LGTBQ mingħajr ebda pressjoni mill-UE. Mela jkun hekk ukoll bl-abort ”, qal Alfred Sant lill-Parlament Ewropew.

Intant, waqt l-intervent tiegħu, Alfred Sant laqa’ elementi oħra fit-test tar-riżoluzzjoni, bħas-sejħa għal aċċess universali għas-saħħa u d-drittijiet sesswali u riproduttivi u għal użu mtejjeb ta’ teknoloġiji emerġenti għal trattamenti u metodi dijanjostiċi.

Alfred Sant laqa’ wkoll l-emfasi fuq il-provvediment ta' firxa komprensiva ta’ servizzi tas-saħħa, inkluża s-saħħa fiżika u mentali kif ukoll is-sejħa għall-Istati Membri biex jagħmlu disponibbli prodotti tas-saħħa mingħajr tossini għan-nisa