'L-UE teħtieġ mekkaniżmu biex tissalvagwardja s-saltna tad-dritt' - Alfred Sant

Waqt li kien qed jindirizza l-plenarja tal-Parlament Ewropew, Alfred Sant qabel mal-prinċipju li r-rispett tad-drittijiet fundamentali għandu jkun salvagwardjat fil-politika u fl-atti kollha tal-UE

l-MEP Alfred Sant
l-MEP Alfred Sant

L-eks Prim Ministru Laburista u l-Membru Parlamentari Ewropew  Alfred Sant ivvota favur riżoluzzjoni tal-Parlament Ewropew dwar il-kundizzjonalità tal-istat tad-dritt u qal li din tista’ tkun pass lejn l-introduzzjoni ta’ mekkaniżmu tal-UE li verament u b’mod leġittimu jissalvagwardja l-istat tad-dritt fl-Unjoni Ewropea.

Il-mekkaniżmu tal-kundizzjonalità tas-saltna tad-dritt huwa għodda ġdida mfassla biex tipproteġi l-fondi tal-UE milli jintużaw ħażin mill-gvernijiet tal-UE li jinstabu li naqsu milli jirrispettaw il-prinċipju tas-saltna tad-dritt.

Waqt li kien qed jindirizza l-plenarja tal-Parlament Ewropew, Alfred Sant qabel mal-prinċipju li r-rispett tad-drittijiet fundamentali għandu jkun salvagwardjat fil-politika u fl-atti kollha u żied jgħid li l-proċeduri biex jiġi implimentat dan l-għan għandhom ikunu trasparenti u oġġettivi jekk iridu jkunu validi u sinifikanti.

Għandhom ikunu ħielsa minn kull manuvrar politiku suġġettiv u partiġġjan, u applikabbli indipendentement mill-fergħat "eżekuttivi" u "leġislattivi" tal-UE.

“Sfortunatament, ir-rekord ma kienx konsistenti meta l-konsiderazzjonijiet tas-saltna tad-dritt ġew għall-iskrutinju tal-istituzzjonijiet tal-UE, mhux l-inqas ta’ dan il-Parlament. Konsistentement, il-kriterji politiċi għelbu l-perspettivi tal-fatti. In-naħat kollha lagħbu din il-logħba imma d-dokument li vvutajna fuqu jillimita effetti bħal dawn ”, qal Alfred Sant lill-ewroparlamentari.

“Tpoġġi konfini ċari għall-qasam tal-applikazzjoni tal-iċċekkjar dwar is-saltna tad-dritt. Dan mhux ideali iżda, fiċ-ċirkostanzi, jmexxi l-quddiem fokus sinifikanti għal kif jistgħu jiġu żviluppati konsiderazzjonijiet dwar is-saltna tad-dritt ”.

Fil-preżent, minkejja r-retorika, mekkaniżmi li verament jissalvagwardjaw is-saltna tad-dritt fl-UE ma jeżistux, qal Alfed Sant.

Ir-riżoluzzjoni kienet adottata bi 529 vot favur, 148 kontra u 10 astensjonijiet.

Ewropej Funded by the European Union

Dan l-artiklu jifforma parti minn sensiela jisimha Ewropej. Din parti minn inizzjattiva ta' tlett organiżazzjonijiet tal-aħbarijiet, iffinanzjata mill-Parlament Ewropew biex iqarreb iċ-ċittadini Maltin max-xogħol tal-PE u jżommhom infurmati fuq is-suġġetti li jmissulhom il-ħajja ta' kuljum. Dan l-artiklu jirrefletti l-veduti tal-awtur. Il-Parlament Ewropew mhuwiex responsabbli għall-użu li jista' jsir mill-informazzjoni hawn provduta.

More in Ewropej