Tanker Malti, Hellas Aphrodite, ġie attakkat minn pirati waqt li kien miexi mill-port ta’ Sikka fl-Indja lejn Durban fl-Afrika t’Isfel, qrib il-kosta tas-Somalja. Skont rapporti internazzjonali, il-pirati fetħu n-nar b’magni tal-gwerra qabel telgħu abbord il-vapur.
Il-kumpanija Griega Latsco Marine Management, li tmexxi l-vapur, ikkonfermat l-attakk iżda qalet li l-24 membru tal-ekwipaġġ jinsabu kollha sikuri u ġew ikkuntattjati.
L-Aġenzija tal-Operazzjonijiet Marittimi tar-Renju Unit (UKMTO) ħarġet twissija lill-bastimenti fl-inħawi wara li kaptan ta’ vapur irrappurtat li ġie segwit minn dgħajsa żgħira li fetħet in-nar lejh. “Il-vapur ġie attakkat b’armi ħfief u RPGs minn dgħajsa waħda li resqet minn wara,” qalet l-UKMTO fi stqarrija.
Skont il-kumpanija privata tas-sigurtà marittima Ambrey, il-pirati kienu qed joperaw minn dgħajsa tas-sajd Iranjana li kienu serqu qabel, u użawha bħala bażi għall-attakk.
Dan l-inċident seħħ ftit jiem biss wara li bastiment ieħor, il-Stolt Sagaland — imniżżel taħt il-bandiera tal-Gżejjer Cayman — kien ukoll fil-mira ta’ attakk suspettat ta’ pirati, li fih kien hemm skambju ta’ nar bejn il-gwardji armati tal-vapur u l-aggressuri. Il-kumpanija operatriċi Stolt-Nielsen ikkonfermat li kien hemm attentat ta’ serqa nhar it-3 ta’ Novembru, iżda dan falla.
Skont is-sit vesselfinder.com, il-Hellas Aphrodite huwa tanker taż-żejt u kimiċi twil 183 metru u wiesa’ 32 metru, mibni fl-2016.
L-awtoritajiet internazzjonali qed isegwu mill-qrib is-sitwazzjoni hekk kif dan l-attakk iqajjem tħassib dwar it-tkabbir mill-ġdid tal-attivitajiet tal-pirati fl-Oċean Indjan, wara snin ta’ kwiet relattiv.
