Il-militar Iżraeljan ħabbar li l-waqfien mill-ġlied f’Gaza reġa’ beda nhar l-Erbgħa, wara li matul il-lejl kien wettaq attakki bl-ajru qawwija fuq diversi żoni tal-enklav Palestinjana.
L-attakki ġew ordnati mill-Prim Ministru Iżraeljan Benjamin Netanyahu, li akkuża lil Hamas li kiser il-ftehim ta’ waqfien mill-ġlied li kien ġie miftiehem fl-10 ta’ Ottubru. Skont Netanyahu, Hamas ta lill-awtoritajiet Iżraeljani parti minn ġisem ta’ ostaġġ li fil-fatt kienet diġà nstabet qabel f’fażi bikrija tal-kunflitt.
Uffiċjali Iżraeljani akkużaw lil Hamas li ippjanat l-iskoperta falza ta’ xi fdalijiet nhar it-Tnejn, filwaqt li sostnew li dan kien attentat biex jintensifikaw it-tensjoni.
Wara dawn l-avvenimenti, suldati Iżraeljani kienu involuti f’xogħol ta’ skambju ta’ nar f’Rafah, fejn inqatel suldat Iżraeljan li wkoll kellu ċ-ċittadinanza Amerikana. Hamas ċaħdet kwalunkwe involviment dirett fl-inċident.
104 persuna mejta, fosthom 46 tifel u tifla
Skont il-Ministeru tas-Saħħa Palestinjan, mill-inqas 104 persuna nqatlu fl-attakki mill-ajru ta’ matul il-lejl, 46 minnhom tfal, u aktar minn 250 oħra ndarbu. L-awtoritajiet qalu li n-nisa u t-tfal jiffurmaw il-maġġoranza tal-vittmi.
Hamas sostniet li qed issibha diffiċli tidentifika jew tirkupra l-katavri tal-ostaġġi minħabba l-qerda estensiva ta’ binjiet u infrastruttura f’Gaza, filwaqt li Iżrael akkużaha li intenzjonalment qed ittardja r-ritorn tal-fdalijiet.
Trump jiddefendi l-pożizzjoni Iżraeljana
Il-President Amerikan Donald Trump qal li Iżrael kien iġġustifikat fl-attakk tiegħu, wara l-qtil tas-suldat Iżraeljan li kien ukoll ċittadin Amerikan. Trump iddeskriva l-azzjoni ta’ Iżrael bħala “rispons leġittimu għall-aggressjoni u l-qerq ta’ Hamas.”
Il-waqfien mill-ġlied, li issa jidher li reġa’ ġie infurzat, wasal wara ġranet ta’ eskalazzjoni ġdida fil-vjolenza u tensjonijiet politiċi intensi bejn iż-żewġ naħat.
