Il-Belt Valletta taħt assalt
Stabbilimenti tar-ristoranti u barijiet flimkien ma’ ħwienet kummerċjali biddlu l-belt kapitali f’tipo ta’ bażaar, b’anarkija totali, nies fuq xulxin, turisti kullimkien, storbju u mużika f’kull ħin, ħmieġ u inkonvenjenza għar-residenti Beltin.
Fl-aħħar għaxar snin, il-Belt Valletta nbidlet totalment u spiċċat kummerċjalizzata bla ebda kontroll fuq x’jagħmlu l-istabbilimenti tal-ikel u l-barijiet, flimkien mal-ħwienet kummerċjali. Il-Belt ukoll saret Mekka għaż-żgħażagħ u filwaqt li l-attività ekonomika għenet lill-Belt, ikkontribwiet fl-istess ħin għal ambjent xejn sabiħ u konsumerista. Jidher li fuq il-karta hemm ħafna wegħdiet dwar il-Belt, imma realistikament il-pulizija u d-Dipartiment tal-Lands u entitajiet oħra ftit li xejn qed jieħdu azzjoni biex il-liġijiet jiġu enforzati.
Kull fejn tħares tara mwejjed u siġġijiet, apparti mijiet ta’ turisti li qed joħonqu l-Belt. Imbagħad hemm il-mużika u l-istorbju li jibqgħu għaddejjin sa kmieni filgħodu. Jidher li hemm paraliżi assoluta u nuqqas ta’ apprezzament biex il-Belt terġa’ tiġi għan-normalità mingħajr l-anarkija li teżisti. Biex tgħaxxaqha, in-numru ta’ stabbilimenti turistiċi sploda — bi pressjoni akbar fuq l-infrastruttura tal-Belt.
Huwa ċar li qabel ma jkun hemm deċiżjoni minn fuq nett fil-gvern, l-affarijiet mhux se jinbidlu.
More in Socjali
.png)
