[It-tieni parti] Kienu jsejħulhom “Broads”

Joan Shawlee (1926-1987). Bjondija, dejjem ferħana u anki vulgari, kienet fl-element naturali tagħha ġo films bħal Some Like It Hot (1959), The Apartment (1960), Irma La Douce (1963), The St. Valentine’s Day Massacre (1967) u f’The Wild Angels (1966), dwar gang ta’ sewwieqa ta’ muturi fejn isibuha bħala Momma Monahan.  

Audrey Totter (1917-2013). Sikwit kienet tinterpreta xi waħda qalila ta’ bla emozzjoni. F’Tension (1949) tgħajjar lill-ispiżjar żewġha “Little Pill Pusher” u tirridikolah, kif ukoll wara tissieħeb miegħu biex joqtlu lill-maħbuba tiegħu. Fil-Western The Woman They Almost Lynched (1953) għandha dwell bil-pistola ma’ mara oħra.  

Carolyn Jones (1930-1983). Fl-ewwel parti tagħha kellha d-distinzjoni dubjuża li tidher bħala statwa tax-xema’ f’House Of Wax (1953), li kien bit-3D. Kienet it-tfajla ta’ Mickey Rooney bħala l-protagonist gangster Baby Face Nelson (1957) u wara t-tfajla ta’ Elvis Presley f’King Creole (1958). F’dawn iż-żewġ films hi tmut. Ħallietna ta’ 53 sena bil-marda qerrieda tal-kanċer.  

Barbara Nichols (1932-1976). Lil din l-attriċi li kienet rebħet it-titlu ta’ Miss Dill Pickle kienu jużawha l-aktar f’kummiedji jew bħala waħda inferjuri tat-tip ta’ Marilyn Monroe — bjondija, thobb turi ruħha, żeffiena li tqajjem kurżità fl-irġiel, b’leħen xi ftit maħnuq kif uriet f’The Naked And The Dead (1958), film tal-gwerra. Spikkat ukoll f’dan il-lat f’The Wild Party (1956), Pal Joey (1957), Sweet Smell Of Success (1957) u That Kind Of Woman (1959). Mietet fl-għomor ta’ 47 sena minn komplikazzjonijiet intimi fil-milsa u l-fwied ikkawżati minn minn żewġ inċidenti separati bil-karozza.  

Mara Corday (1936-2025). Marilyn Joan Long, magħrufa professjonalment bħala Mara Corday, barra attriċi kienet mudella, showgirl u ppożat xi drabi fil-magażin Playboy. Fis-snin ħamsin ħadmet f’bosta films medjokri tal-biża’ u Westerns. Wara li żżewġet, ikkonċentrat fuq il-familja. Kienet ħabiba sewwa ma’ Clint Eastwood u wara li hu kellu parti verament ċkejkna f’Tarantula (1955), fejn hi kienet il-protagonista, Eastwood ħaddimha f’erba’ films minn tiegħu fosthom The Gauntlet u Sudden Impact.  

Coleen Gray (1922-2015). Bdiet taħdem bħala waħda li sservi l-ikel f’restorant; wara studjat ir-reċtar u skoprieha wieħed li jfittex it-talent għall-kumpanija 20th Century Fox. Fil-bidu dehret f’żewġ produzzjonijiet tajbin mal-attur Tyrone Power, f’Nightmare Alley (1947) u f’The Razor’s Edge (1946) kif ukoll f’Kiss Of Death (1947). F’Kansas City Confidential (U.K. The Secret Four -1952) hi żżomm mal-onest John Payne, minkejja li missierha Preston Foster hu sid korrott li ried jisraq bank. F’The Killing (1956) kienet il-ħabiba ta’ Sterling Hayden imma l-preżenza tagħha f’dan il-film ġiet issuperata mill-brava Marie Windsor li l-preżenza tagħha l-aktar li baqgħet fil-moħħ tal-udjenzi.  

Gloria Grahame (1923-1981). Barra li hi character actress, ġieli wkoll laħqet mal-ewlenin. Fil-bidu tal-karriera ħadmet ta’ dik li jsejħulha fallen woman — mara li tinkaram wara l-ħażin jew li taqta’ qalbha mid-dinja meta tkun iddisprata, sa anki tikkontempla suwiċidju f’It’s A wonderful Life (1946) — fi Human Desire (1954) taħrab lir-raġel però hu joqtolha u f’The Big Heat (1953) Lee Marvin jitfa’ kitla misħun jagħli f’wiċċha wara li hi qarrqet bih. F’The Bad And The Beautiful (1951) tkun imdejqa bir-raġel tagħha li jikteb screenplays u tmut wara li kraxxja l-ajruplan mal-ħabib. Insibuha taħdem aktar rwoli minn dawn u jidher li kienu għall-gosti tagħha. 

L-istess nistgħu ngħidu għal Lee Remick li bi ftit sforz ieħor kienet tilħaq il-quċċata tal-popolarità li kien jixirqilha. Barra li ħadmet f’diversi films fis-snin sittin f’partijiet ewlenin, fid-diċennju ta’ qabel sabet ruħha fil-kategorija ta’ character actress. Fl-ewwel dehra tagħha fiċ-ċinema fl-1957, f’A Face In The Crowd bħala l-aktar kompetitriċi sexy li tiżfen bit-tanbur, mhux biss rebħet il-premju, imma wkoll lill-kap tal-ġurija. Mhux l-ewwel darba li wara ħadmet ta’ xi vittma bħal f’These Thousand Hills (1959) bħala prostituta, f’Anatomy Of A Murder (1960) żewġha joqtol lil dak li stupraha, kienet involuta fi qtil f’The Running Man (1963) u tinkaram bil-kbir wara x-xorb alkoħoliku f’Days Of Wine And Roses (1962).  

Lola Albright (1924-2017). Fid-dehriet tagħha fuq il-liżar il-kbir, din l-attriċi tkun il-mara tal-maniġer qarrieqi tal-boxing, imma ssir tħobb lill-boxer rebbieħ, Kirk Douglas f’The Champion (1949). Wara dehret ġo numru ta’ produzzjonijiet medjokri, fosthom xi Westerns sakemm irpiljat f’A Cold Wind In August (1961) bħala żeffiena li tneħħi l-ħwejjeġ u li jkollha relazzjoni ma’ teenager. Il-films li ġew wara kienu bil-wisq aħjar minn dawk tas-snin ħamsin.  

Anne Francis (1930 -2011). Aktarx li tibqa’ msemmija l-aktar għall-parti tagħha fil-klassiku tax-xjenza fittizja Forbidden Planet (1956), b’sorpriża bbażat minn fuq ix-xogħol letterarju The Tempest ta’ William Shakespeare. Impressjonat bħala l-mara tqila tal-għalliem Glenn Ford f’The Blackboard Jungle (1955) imminaċċjata b’ittri mill-istudenti teddy boys tal-klassi ta’ żewġha. Kienet prostituta li ssir tħobb suldat f’Battle Cry (1955) u kienet taf kif tirrispondi spirtu pront lil George Sanders f’The Scarlet Coat (1955). Reġgħet ħadmet ta’ mara vizzjuża li jfittxuha bit-telefown f’Girl Of The Night (1960).  

Kważi l-atturi nisa kollha li semmejt kienu magħrufin sewwa miċ-ċineasti però xi oħrajn kienu tassew character actors, aktar familjari mal-udjenzi minn wiċċhom u l-qagħda tagħhom, bħal Veda Ann Borg, Dolores Dorn, Eve Arden, Lynn Bari, Valerie French, Signe Hasso, Dolores Michaels, Dorothy Provine (ukoll kantanta), Fay Spain, u tant oħrajn.  

Mill-bidu tal-millenju ’l hawn u minn meta bdew ikunu popolari l-films tas-supereroj, insibu ħafna nisa involuti f’films ta’ azzjoni intensa jew ta’ vendetta spjetata. Meta kkumparati ma’ The Broads, dawn jidhru, fil-maġġoranza tagħhom, artifiċjali, superfluwi, esaġerati u li jnisslu xi tbissima ta’ stmerrija!