Malta International Contemporary Art Space jniedi wirja ġdida b’sitt artisti Maltin ewlenin

Malta International Contemporary Art Space (MICAS) ħabbar it-tieni wirja tiegħu, L-Ispazju li ngħammru fih,  li se tkun imnedija s-Sibt, l-14 ta’ Ġunju 2025, u li tinkludi xogħol minn sitt artisti stabbiliti Maltin. 

Is-sitt artisti Maltin huma Caesar Attard, Vince Briffa, Austin Camilleri, Joyce Camilleri, Anton Grech u Pierre Portelli, b’wirja li se tinkludi pitturi, skultura, u xogħol awdjo-viżiv. 

Il-Ministru għall-Wirt Nazzjonali u l-Arti Owen Bonnici ħabbar il-wirja flimkien mad-Direttur Artistiku tal-MICAS, Edith Devaney. 

“Din il-wirja timmarka pass sinifikanti għall-arti kontemporanja Maltija. Qed nesebixxu artisti Maltin li b’xogħolhom iħabbtuha ma’ artisti oħrajn internazzjonali, u żewwaqna ħolm li kellu dan il-pajjiż biex ikollna spazju sabiex nesebixxu, kemm xogħol internazzjonali, kif ukoll Malti – kienet sfida kemm biex invaraw dan il-proġett iżda anke biex inżewġu l-ambizzjoni li nattiraw artisti internazzjonali lejn Malta ma’ dik li nagħtu pjattaforma internazzjonali lill-artisti Maltin. Ninsab kuntent li l-MICAS huwa impenjat li jiċċelebra l-arti Maltija fl-ogħla forma tagħha u jġibha fi stadju internazzjonali usa’,” qal Bonnici. 

Id-Direttur Artistiku tal-MICAS Edith Devaney qalet li s-sitt artisti li se jidhru f’L-Ispazju li ngħammru fih, kollha stabbilixxew reputazzjonijiet estensivi.  

“Malta ilha tospita xena tal-arti u l-kultura b’saħħitha għal għexieren ta’ snin, bl-iżvilupp modern tagħha jikseb momentum wara l-Indipendenza fl-1964. B’din l-evoluzzjoni lejn il-moderniżmu, l-artisti Maltin ta’ spiss tħarrġu f’ċentri Ewropej, u involvew ruħhom f’temi globali filwaqt li żammew konnessjonijiet mal-wirt kulturali uniku tal-gżira. U għal ħafna, dan wassal għal rikonoxximent u opportunitajiet ferm lil hinn minn Malta.” 

Organizzati madwar it-tema tal-ispazju tagħna l-bnedmin — kemm reali kif ukoll immaġinati — kull wieħed mis-sitt artisti f’L-Ispazju li ngħammru fih se jwieġeb b’modi differenti, b’xi wħud jevokaw sens ta’ pajsaġġ, filwaqt li oħrajn jieħdu perspettiva aktar kunċettwali dwar l-idea tal-ispazju, u b’estensjoni, ‘il-post’. 

Il-wirja se ssir fit-tliet sulari ewlenin tal-mużew, bix-xogħlijiet joħolqu diskors viżiv li jesplora l-kunċett u r-realtà tal-ispazju li kull wieħed minna jipperċepixxi u jgħix fih. 

“Hija dejjem okkażjoni ta’ ċelebrazzjoni hawnhekk fil-MICAS meta artisti Maltin ta’ eċċellenza huma ċ-ċentru tal-attenzjoni tagħna,” qalet iċ-chairperson eżekuttiv tal-MICAS Phyllis Muscat. “L-artisti kollha se jkunu rrappreżentati minn bosta xogħlijiet, li ħafna minnhom ġew prodotti u adattati speċifikament għal din il-wirja. Ninsabu onorati li dawn l-artisti kontemporanji ewlenin laqgħu din l-isfida, u nħeġġu lill-pubbliku Malti jgawdi dan l-ispazju nazzjonali, sabiex ikunu jistgħu jagħtu xhieda għall-aqwa arti kontemporanja Maltija li MICAS għandha x’toffri.” 

Is-sigħat tal-ftuħ u l-informazzjoni tad-dħul tal-MICAS 

• It-Tnejn:                       Magħluqa 
• It-Tlieta – il-Ħamis:     10 a.m. – 6 p.m. 
• Il-Ġimgħa – is-Sibt:     10 a.m. – 8 p.m. 
• Il-Ħadd:                        10 a.m. – 6 p.m. 

Ħlas għad-dħul għall-wirjiet: €10 b’konċessjonijiet. Aċċess għal spazji fil-beraħ, wirjiet tal-iskultura u l-ħanut huwa b’xejn. 

Jekk jogħġbok żur www.micas.art għal aktar informazzjoni u segwi @micasmalta fuq Instagram. 

Dwar l-artisti 

Caesar Attard 

Caesar Attard (t. 1946) studja fl-Iskola tal-Arti ta’ Malta (1966-1973) u baqa’ attiv b’mod konsistenti fix-xena tal-arti lokali. Hu pparteċipa f’wirjiet f’Malta u barra minn Malta, kif ukoll bħala membru tal-gruppi tal-arti lokali Spectrum ‘67, Vision ‘74, u Atelier ‘56. Attard kien għalliem tal-Arti mill-1970 sal-1995 u lettur fil-Prattika tal-Arti Viżiva u l-Istorja tal-Arti fid-Dipartiment tal-Arti fil-Junior College tal-Università ta’ Malta mill-1995 sal-2011. Minbarra l-pittura, Attard ilu jesperimenta mis-snin sebgħin f’forom ta’ arti mhux tradizzjonali bħall-arti parteċipattiva u installazzjonijiet. Minbarra li wera f’numru ta’ wirjiet kollettivi f’Malta u fl-Ewropa, Attard kellu numru ta’ wirjiet personali. 

Vince Briffa 

Vince Briffa huwa artist, kuratur u riċerkatur multimedjali. Studja t-tpinġija u l-pittura, kif ukoll l-arti tal-midja. Il-kunċetti tiegħu huma bbażati fuq oqsma artistiċi u estetiċi kontemporanji, u jintegraw approċċi u tħassib mill-oqsma tal-arti, is-soċjoloġija, ir-reklamar, l-istudji tal-films, il-letteratura u l-filosofija. Matul dawn l-aħħar erbgħin sena, ix-xogħol ta’ Briffa ġie esebit f’xi wħud mill-aktar mużewijiet u galleriji prestiġjużi fid-dinja inkluż il-Padiljun ta’ Malta u l-Biennale tal-Arti ta’ Venezja fl-1999 u fl-2019. 

Austin Camilleri 

Austin Camilleri (t. 1972) jaħdem simultanjament, u mhux b’mod ġerarkiku, fl-installazzjoni, il-pittura, it-tpinġija, il-vidjo u l-iskultura. Filwaqt li jibbaża ruħu prinċipalment fuq l-istorja tal-arti tal-Punent, il-kultura popolari u t-tradizzjonijiet tal-immaġni tal-poter, huwa jesplora t-tensjoni bejn il-materjal u d-diġitali, il-personali u l-pubbliku, bil-kreazzjoni ta’ saffi ta’ tekniki u modalitajiet. Camilleri twieled f’familja ta’ artisti. Studja fl-Università ta’ Malta u fl-Accademia Pietro Vannucci f’Perugia, wara li ngħata borża ta’ studju ta’ erba’ snin fl-1991. Huwa l-fundatur ta’ 356, membru fundatur ta’ stART, Fundazzjoni Klula, u huwa lettur mistieden fil-Fakultà tal-Ambjent Mibni, l-Università ta’ Malta. Huwa esebixxa b’mod wiesa’, inkluż fil-Biennale ta’ Venezja u l-Biennale ta’ Ostrale fi Dresden. 

Joyce Camilleri 

Joyce Camilleri (t. 1980) hija artista bbażata f’Malta u membru tad-Dipartiment tal-Arti Viżiva fi ħdan il-Fakultà għall-Ambjent Mibni fl-Università ta’ Malta, kif ukoll il-fundatur ta’ Jo Borg Gallery, forum li jappoġġja artisti emerġenti, kif ukoll dawk f’nofs il-karriera u dawk stabbiliti. Il-prattika ta’ Camilleri għandha għeruq fondi fit-tpinġija u l-istampar, li jinfurmaw il-pittura tagħha, u segwiet taħriġ estensiv fil-pedagoġija, it-teorija u l-prattika tal-arti f’Malta u barra minnha. Hija għandha M. Ed. Artist Teacher mill-University of West Scotland (2017), Diploma fl-Istampar tal-Belle Arti mill-Iskola tal-Arti ta’ Malta (2008), u B. Ed. (Hons) fl-Arti mill-Università ta’ Malta (2002). Matul is-snin, Camilleri esebiet f’wirjiet personali u kollettivi lokali, wirjiet akkademiċi internazzjonali u wirjiet tal-arti grafika madwar l-Ewropa. 

Anton Grech 

Anton Grech (t. 1965) studja fl-Iskola tal-Arti ta’ Malta, fl-Accademia di Belle Arti di Firenze, l-Italja u fil-Kunstakademie Düsseldorf, il-Ġermanja. Grech kien membru tal-istaff akkademiku artistiku fil-Kunstakademie u kkollabora ma’ diversi artisti Ġermaniżi ewlenin. Grech ilu jgħallem fl-Iskola tal-Arti ta’ Malta u fl-Università ta’ Malta, fejn huwa wkoll Kap tad-Dipartiment tal-Arti Viżiva fil-Fakultà tal-Ambjent Mibni. Grech huwa membru fundatur tal-gruppi tal-artisti stART u WARTI. Grech esebixxa, kemm f’Malta u internazzjonalment, kif ukoll ħa ħsieb esebizzjonijiet ta’ artisti Maltin emerġenti. 

Pierre Portelli 

Pierre Portelli (t. 1961) jaħdem prinċipalment fl-installazzjoni, l-iskultura, il-vidjw u l-arti tal-midja mħallta. Ix-xogħol tiegħu jinvestiga l-proċessi tal-bidla, l-interazzjonijiet tad-dinjiet soċjali permezz tal-iskultura, ix-xogħol speċifiku għas-sit, il-lingwa, u xi drabi dawk s-sottotoni b’laqta ċajtiera u mqarba. Studja fl-Iskola tal-Arti u d-Disinn ta’ Swindon fir-Renju Unit u huwa membru fundatur ta’ stART, grupp Malti tal-arti kontemporanja, u kollaboratur ta’ The Little Constellations, network għall-arti kontemporanja. Fl-2003 ikkollabora ma’ Love Difference u Michelangelo Pistoletto fil-50 Biennale ta’ Venezja. Huwa lettur mistieden fil-Fakultà tal-Edukazzjoni fl-Università ta’ Malta u bħalissa huwa l-President tal-Kunsill tal-Iskola Maltija tal-Arti. Pierre Portelli esebixxa f’istituzzjonijiet nazzjonali u internazzjonali, kif ukoll oriġina proġetti transdixxiplinarji bbażati fuq ir-riċerka ma’ kompożituri u artisti tal-mużika, koreografi, atturi, awturi u huwa kollaboratur frekwenti fil-produzzjonijiet teatrali. Huwa l-kokuratur u koriċerkatur tal-proġett REL•INK Indelible Narratives li beda fl-2016, li jirriċerka u jesplora l-istorja u n-narrattivi tat-tattwaġġi ta’ Malta u r-rabtiet ma’ bliet portwarji Mediterranji oħra.