L-Awtorità għall-Integrità fl-Isport Malti (AIMS) ħabbret li ħatret lil Kevin Azzopardi bħala l-Kap Eżekuttiv il-ġdid tagħha, wara sejħa pubblika.
Il-ħatra tiegħu ġiet wara r-riżenja ta’ Jean Claude Micallef f’Marzu li għadda, li kien irtira minn din il-kariga biss tliet xhur wara li kien inħatar, fost tensjonijiet interni u kontroversji madwar l-awtorità.
F’komunikat, l-AIMS iddeskriviet lil Azzopardi bħala “professjonist b’esperjenza twila fl-isport u fit-tmexxija edukattiva u amministrattiva”.
Azzopardi, li ggradwa mill-Università ta’ Malta fl-2002 fil-qasam tal-Edukazzjoni Fiżika, għallem għal tnax-il sena qabel ma nħatar Uffiċjal Edukattiv għall-Edukazzjoni Fiżika u l-Isport fl-2014 fi ħdan il-Ministeru għall-Edukazzjoni, Sport, Żgħażagħ, Riċerka u Innovazzjoni.
Matul dawk is-snin mexxa diversi inizjattivi bħall-National Sport School, Sport Career Development Programme, u l-Malta School Games. Huwa wkoll iżomm Masters fl-Istudji Komparattivi Ewro-Mediterraneji fl-Edukazzjoni u bħalissa qed jagħmel riċerka dottorali fl-Istitut għall-Istudji Maltin.
L-involviment tiegħu fl-isport imur lil hinn mill-edukazzjoni. Azzopardi kien referee tal-futbol għal 18-il sena, fosthom ukoll fuq livell internazzjonali. Wara rtira mill-grawnd, serva bħala Direttur tar-Referees fl-Assoċjazzjoni Maltija tal-Futbol (MFA) u aktar tard bħala osservatur tar-referees tal-UEFA.
Huwa serva wkoll bħala Referee Development Officer mal-Northumberland FA fir-Renju Unit.
Mill- 2021, Azzopardi kien Segretarju Ġenerali tal-Kumitat Olimpiku Malti (MOC), fejn kellu rwol ewlieni fl-organizzazzjoni tal-Logħob tal-Istati Żgħar tal-Ewropa 2023 li saru f’Malta. Kien ukoll involut fil-kampanja rebbieħa biex Malta u Għawdex jospitaw il-Commonwealth Youth Games 2027, kif ukoll fl-isforzi biex Għawdex ingħaqad mal-International Island Games Association.
Fi ħdan il-MOC, kien ir-rappreżentant ta’ Malta fuq kwistjonijiet ta’ integrità fl-isport, fejn ħadem ma’ l-International Olympic Committee dwar il-prevenzjoni tal-manipulazzjoni tal-kompetizzjonijiet.
Il-Ministeru għall-Edukazzjoni, Sport, Żgħażagħ, Riċerka u Innovazzjoni ifraħ lil Azzopardi għall-ħatra tiegħu u awguralu suċċess fit-tmexxija ta’ AIMS – l-entità responsabbli biex tassigura l-integrità u t-trasparenza fl-isport Malti.
L-AIMS, li twaqqfet biex tiġġieled kwistjonijiet bħall-armar tal-logħob u d-doping, affaċċjat taqlib fl-aħħar xhur. L-eks CEO Jean Claude Micallef irriżenja f’Marzu, u kkwota diffikultajiet mal-bord tal-awtorità u ċ-chairman, l-imħallef irtirat Antonio Mizzi. It-tluq tiegħu segwa tilwim intern u kontroversja dwar il-kiri mill-awtorità ta’ eks futboler li qabel kien instab ħati ta’ attentat ta’ tixħim.
