Spiteri jitlob li l-Kumitat tas-Saħħa jiddiskuti l-formularju tal-mediċini tal-Gvern

Il-kelliem tas-saħħa tal-Oppożizzjoni, Stephen Spiteri, ħabbar fil-Parlament nhar l-Erbgħa li se jagħmel talba formali lill-Kumitat tas-Saħħa, immexxi mid-Deputata Romilda Zarb, sabiex jiddiskuti l-formularju tal-mediċini tal-Gvern.

Waqt diskors ta’ tmiem is-seduta, Spiteri qal li l-Oppożizzjoni dejjem kienet konsistenti dwar l-użu tal-mediċini ġeneriċi u li se tkompli tkun hekk.

F’kummenti lil gazzetta oħt, MaltaToday wara d-diskors, Spiteri sostna li, minkejja li m’hemm xejn ħażin bl-użu ta’ mediċini ġeneriċi, hemm bżonn ta’ aktar uniformità kemm fl-ippakkjar kif ukoll fil-prezz.

“Għandi pazjenti li jitħawdu meta jaraw kaxxa ta’ kulur differenti, jew saħansitra jieħdu d-doża ħażina,” qal.

Qal ukoll li filwaqt li jifhem li hemm proċess standard ta’ tendering għax-xiri tal-mediċina inkwistjoni, staqsa jekk li wieħed imur għall-orħos ditti jagħmilx sens.

Id-dikjarazzjoni tiegħu waslet ftit wara kummenti tal-Kap tal-Oppożizzjoni Alex Borg, li qal li gvern Nazzjonalista fil-futur jiżgura mediċini ta’ “kwalità tajba, mhux ġeneriċi.”

Il-kummenti ta’ Borg kienu kkritikati minn diversi naħat, fosthom mill-Gvern u mill-Awtorità tal-Mediċini, li wissew li diskors bħal dan jista’ jqanqal inċertezza fost il-pazjenti.