Minn mistoqsija parlamentari ġie żvelat li matul l-2023, f’Malta kien hawn 497 każ ta’ divorzju.
Nhar l-Erbgħa, il-Membru Parlamentari tal-Partit Nazzjonalista, Jerome Caruana Cilia għamel din il-mistoqsija lill-Ministru għall-Ġustizzja u r-Riforma tas-Settur tal-Kostruzzjoni, Jonathan Attard waqt seduta parlamentari.
Bħala risposta, Attard wieġeb illi fis-sena ta’ qabel, f’Malta seħħew 480 każ ta’ divorzju, filwaqt li f’Għawdex ġew irreġistrati 17-il każ minnhom.
Mill-banda l-oħra, statistika maħruġa minn Identità, żvelat li fl-2023 ġew irreġistrati 2,036 każ ta’ żwieġ. Dan juri li kien hemm tnaqqis ta’ 201 tieġ meta mqabbel mal-2022 (2,237 każ ta’ żwieġ irreġistrati).
Ħaġa notevoli hi li fl-2023, ma ġiet irreġistrata l-ebda unjoni ċivili.
Intant, kien hemm 36 każ ta’ koabitazzjoni meta mqabbla mal-31 reġistrati fl-2022.
