Mil-lum miljuni ta' persuni Musulmani madwar id-dinja jibdew ix-xahar ta' sawm msejjaħ ir-Ramadan u mal-bidu uffiċċjali tiegħu llum diversi mexxejja minn madwar id-dinja għaddew messaġġi lill-komunità Musulmana, inkluż il-Prim Ministru Robert Abela f'pajjiżna.
"Għal miljiuni madwar id-dinja dan ix-xahar qaddis huwa opportunità biex iġeddu u jsaħħu l-fidi permezz ta' sawm, talb, meditazzjoni riflettiva, karità u l-qari tal-Quran... dawn l-affarijiet huma viċin l-valuri universali tal-paċi, tjubija, imħabba u rispett lejn l-oħrajn. Fl-aħħar xhur rajna kemm il-qawwa tat-talb hija importanti fi żmien ta' sfida."
Anke l-kandidat Demokratiku għall-elezzjoni Presidenzjali Amerikana Joe Biden għadda l-awgurju tiegħu lil miljuni ta' familji li qed josservaw dan ix-xahar.
L-istess il-Prim Ministru Kanadiż Justin Trudeau b'filmat fuq YouTube..
F'Malta wkoll il-PM Robert Abela bagħat l-awgurji tiegħu lill-komunità Musulmana f'Malta bil-kliem 'Ramadan Mubaarak', li jfisser 'Ir-Ramadan imqaddes'.
Fil-qosor: X'inhu Ramadan?
Ir-Ramadan huwa d-disa' xahar fil-kalendarju Iżlamiku osservat minn Musulmani madwar id-dinja bħala x-xahar tas-sawm, talb u riflessjoni. Iż-żmien huwa meqjus bħala kommemorazzjoni tal-ewwel rivelazzjoni lill-Profeta Muhammad. L-osservanza annwali tar-Ramadan huwa meqjus bħala wieħed mill-ħames pilastri tal-Iżlam u jdum għaddej 29 jew 30 jum.
Is-sawm jibda ma' tlugħ ix-xemx u jieqaf fi nżul ix-xemx għall-adulti kollha ħlief dawk morda, tqal, dijabetiċi jew oħrajn b'xi kundizzjonijiet.
L-ikla ta' qabel tlugħ ix-xemx hija meqjusa bħala suhur jew sahoor, filwaqt li l-ikla ta' filgħaxija hija meqjusa bħala iftar jew fatoor.
