Raġel ta’ 39 sena mill-Belt Valletta nżamm arrestat nhar it-Tlieta wara li wieġeb mhux ħati li ħebb għas-Sindku tal-Furjana Nigel Holland u insulentah waqt inċident li seħħ fis-27 ta’ Settembru.
Rittmar Hatherly ġie mixli li insulenta jew hedded lis-sindku, li aggredieh, li kiser il-paċi pubblika u li kien fis-sakra fil-pubbliku. Huwa ġie mixli wkoll li kiser il-kundizzjonijiet ta’ tliet digrieti tal-ħelsien mill-arrest, li wettaq reat matul il-perjodu operattiv ta’ sentenza sospiża u li sar reċidiv.
L-Ispettur Jeffrey Rizzo qal lill-Qorti li l-pulizija ssejħu fi Triq San Publiju, il-Furjana, għall-ħabta tas-6:45pm wara rapporti dwar argument.
Meta waslu fuq il-post, il-pulizija sabu lil Hatherly u lil Holland. Mill-investigazzjonijiet irriżulta li kien inqala’ argument verbali, li matulu Hatherly allegatament kkonfronta lis-sindku u ħebb għalih. Ħadd ma ġarrab ġrieħi.
Hatherly deher li kien taħt l-effett tal-alkoħol u l-pulizija firdu liż-żewġt irġiel.
L-għada, il-pulizija ġabru filmati tas-CCTV tal-inċident. Skont il-prosekuzzjoni, il-filmati juru lis-sindku bilqiegħda waqt li Hatherly beda jersaq lejh u jinsulentah.
Fil-Qorti ntqal ukoll li sal-għada filgħodu Hatherly kien ikkuntattja lil Holland biex jiskuża ruħu għall-aġir tiegħu.
Il-validità tal-arrest ta’ Hatherly ma ġietx ikkontestata.
Id-difiża talbet għall-ħelsien mill-arrest, iżda l-prosekuzzjoni oġġezzjonat minħabba l-biża’ ta’ intralċ tal-provi, partikolarment minħabba li Holland għadu ma xehedx.
L-avukat Yanica Barbara argumentat li din il-biża’ ma kinitx sostanzjata, filwaqt li rrimarkat li l-filmati tas-CCTV li juru dak li seħħ kienu diġà ġew ippreservati mill-pulizija. Hija saħqet ukoll li ħadd ma weġġa’ fl-inċident u li Hatherly kien ikkuntattja lil Holland qabel ġie arrestat sabiex jiskuża ruħu u jerfa’ r-responsabbiltà għall-aġir tiegħu.
Id-difiża sostniet ukoll li kwalunkwe progress li kien għamel Hatherly jisfa fix-xejn jekk jinżamm arrestat.
Il-Qorti ċaħdet it-talba għall-ħelsien mill-arrest minħabba l-biża’ ta’ intralċ tal-provi.
L-Ispettur Jeffrey Rizzo mexxa l-prosekuzzjoni, filwaqt li l-avukat Yanica Barbara dehret għal Hatherly. Il-Maġistrat Caroline Farrugia Frendo ppresediet is-seduta.
