Sewwieq ta’ mutur iweġġa’ gravi f’ħabta f’Ħal Għaxaq

Sewwieq ta’ mutur ta’ 29 sena residenti Tas-Sliema sofra ġrieħi gravi wara li kien involut f’inċident tat-traffiku f’Ħal Għaxaq il-Ħadd.

L-inċident seħħ għall-ħabta tas-1pm fi Triq Għar Dalam, fejn marru minnufih uffiċjali tal-pulizija.

Mill-ewwel stħarriġ irriżulta li Mazda Demio, misjuqa minn raġel ta’ 27 sena residenti San Ġwann, kienet involuta f’ħabta mal-mutur misjuq mir-raġel ta’ 29 sena.

Fuq il-post issejjaħ tim mediku, filwaqt li ambulanza ħadet lis-sewwieq tal-mutur l-Isptar Mater Dei.

Aktar tard huwa ġie ċċertifikat li sofra ġrieħi gravi.

L-investigazzjonijiet tal-pulizija dwar l-inċident għadhom għaddejjin.