Waħda mill-aktar referenzi politiċi diretti tas-seduta tal-lum ħarġet minn chat bejn Melvin Theuma u Yorgen Fenech, li fiha Theuma bagħat lil Fenech artiklu ta’ MaltaToday li kien qed jirrapporta li l-Partit Laburista kellu vantaġġ ta’ 80,000 vot.
“Nittamaw li veru,” Theuma kiteb lil Fenech.
Fix-xhieda tiegħu, Theuma spjega għaliex dik l-aħbar kienet importanti għalih dak iż-żmien: skontu, Fenech kien ilu jgħidlu li sakemm il-Labour jibqa’ fil-Gvern, ħadd ma kien se jmissu.
Din ir-referenza kompliet ma’ dak li Theuma kien diġà xehed aktar kmieni, meta qal li Fenech kien jippreżenta ruħu bħala “sod” taħt il-Labour u li hu kien jara l-kontinwità tal-Gvern bħala forma ta’ serħan il-moħħ fil-konfront tal-investigazzjoni.
Fl-istess skambju ta’ messaġġi, Theuma kiteb ukoll dwar il-possibbiltà ta’ inkjesta oħra dwar il-qtil ta’ Daphne Caruana Galizia, u qal lil Fenech li anke jekk xi darba jkun “mejjet u midfun”, il-verità kienet se toħroġ.
Theuma jgħid li 17 Black urietlu li Fenech kellu l-mezzi biex jibqa’ jħallas
Aktar kmieni fis-seduta, fir-recordings issemmew il-power station, il-Panama Papers u 17 Black.
Theuma qal lill-ġurati li kien qed isegwi rapporti fl-aħbarijiet dwar allegati ħlasijiet ta’ €5,000 kuljum marbuta ma’ kumpaniji ta’ Keith Schembri u Konrad Mizzi, u dwar 17 Black ta’ Fenech.
Ix-xhud qal li, f’moħħu, dawk ir-rapporti kienu juru li Fenech kellu l-kapaċità finanzjarja biex ikompli jħallas lill-aħwa Degiorgio.
“Il-poter tagħna huma l-flus,” Theuma qal li Fenech kien jirrepetilu.
Minkejja r-riferimenti ripetuti għal Keith Schembri, Theuma reġa’ għamel distinzjoni ċara bejn dak li kien jaħseb waqt il-perjodu tar-recordings u dak li qed jixhed illum.
Huwa qal li kien ipoġġi lil Schembri “fl-istess keffa” ma’ Fenech minħabba l-istat mentali tiegħu u għax kien jemmen li Schembri kien jgħaddi informazzjoni lil Fenech, iżda insista li Schembri qatt ma tah flus biex tinqatel Daphne u qatt ma tah ordni biex iwettaq xi ħaġa.
“Kien hemm mandant wieħed biss: Yorgen Fenech tat-Tumas Group,” qal Theuma.
“Mur għid lil Fredu għax se toħroġ l-informazzjoni”
Theuma reġa’ tkellem ukoll dwar il-perjodu ta’ qabel il-qtil.
Huwa qal li Fenech kien jagħmillu pressjoni kontinwa biex imur għand Alfred Degiorgio, “Fredu”, għax kien jibża’ li Daphne kienet se tippubblika informazzjoni.
“Mur għid lil Fredu, mur għid lil Fredu għax se toħroġ l-informazzjoni,” Theuma qal li Fenech kien jirrepetilu.
Skont Theuma, Fenech kien jgħidlu wkoll li anke Keith Schembri kien inkwetat.
F’recording, Theuma jinstema’ jgħid li “Keith qiegħed fiha miegħu, żgur”, iżda fil-Qorti huwa reġa’ qal li dik ir-referenza kienet “żball”, u saħaq mill-ġdid li Schembri ma kienx ħallsu jew ikkummissjonah biex isir il-qtil.
Theuma: Fenech kien jieħu informazzjoni mingħand Silvio Valletta
Il-ġurati semgħu wkoll recording fejn Theuma jinstema’ jgħid li “Yorgen lagħab il-logħba ma’ Valletta.”
Ix-xhud spjega li kien qed jirreferi għall-eks Deputat Kummissarju Silvio Valletta.
Skont Theuma, Fenech kien jistieden lil Valletta fir-ranch tiegħu u jipprova jiġbed informazzjoni minnu dwar l-investigazzjoni.
Din kienet l-aħħar f’sensiela ta’ allegazzjonijiet minn Theuma dwar informazzjoni li, skontu, kienet qed tasal għand Fenech minn persuni qrib l-investigazzjoni jew tal-Gvern.
Fenech lil Theuma: “Int biss tinkwetani”
Wara li ntemmet is-sensiela ta’ recordings, il-Prosekuzzjoni bdiet turi lill-ġurati screenshots ta’ chats bejn Theuma u Fenech.
F’wieħed minnhom, Theuma jgħid lil Fenech li kien ra raġel għaddej minn quddiem id-dar u ssuspettah li kien uffiċjal tas-CID.
Fenech wieġbu biex iserraħ rasu għax kien tkellem ma’ “sieħbu” dakinhar filgħodu.
Theuma qal lill-Qorti li s-“sieħeb” kien Keith Schembri.
F’chat oħra, Fenech kiteb lil Theuma:
“Int biss tinkwetani. Ħadd ieħor ma jista’ jagħmilli xejn.”
Theuma wieġbu b’mod li, skontu, kien ifisser li Fenech seta’ jafdah kompletament.
Fenech imbagħad kitiblu:
“Issa inti ħija, u ibnek huwa ibni.”
Theuma qal lill-ġurati li Fenech kien inkwetat li hu seta’ jċedi taħt il-pressjoni u jmur għand il-pulizija.
Theuma: Meta sirt naf li l-Koħħu kien qed jitkellem, għedtlu “Fiex daħħaltni?”
F’chat oħra, Fenech jgħid lil Theuma biex iġib lil ibnu fir-ranch sabiex jilgħab ma’ ibnu, waqt li huma jkollhom ċans “jitkellmu sew.”
Theuma qal li aktar kmieni dakinhar kien għadu kif sar jaf li Vincent Muscat, il-Koħħu, kien qed jitkellem mal-pulizija.
Huwa qal li kien argumenta ma’ Fenech u qallu:
“Fiex daħħaltni?”
Il-Prosekutur Godwin Cini irrimarka wkoll li Fenech kien attiva fuq dik il-konversazzjoni messaġġi li jisparixxu wara ħames minuti.
Theuma jgħid li Fenech kien jiggwidah kif iqarraq b’Johann Cremona
Fost l-aktar chats sinifikanti ta’ wara nofsinhar kien hemm sensiela ta’ messaġġi fejn, skont Theuma, Fenech kien qed jgħidlu kif kellu jqarraq b’Johann Cremona.
Fenech tah struzzjonijiet biex iċempillu, jagħmilha ta’ rrabjat dwar allegat “tradiment”, jistenna ftit u mbagħad jerġa’ jkellmu b’verżjoni oħra tal-istorja.
Fenech qallu biex “jlibbes” l-istorja u jipprepara sew dak li kien se jgħid.
Theuma wieġbu li kien se jikteb kollox bir-reqqa.
Fix-xhieda tiegħu, Theuma qal li dan kien eżempju ta’ Fenech jikkowċjah fuq kif iqarraq b’Cremona.
“Biex inħawdu lil min qed jisma’”
Il-messaġġi komplew b’Fenech jgħid lil Theuma li l-konversazzjoni ma kellhiex tinstema’ qishom kienu qed jiġġieldu, iżda kellha tkun iebsa biżżejjed biex “tfixkel lil min kien qed jisma’.”
Theuma qal li Fenech kien qed jirreferi għas-Servizzi tas-Sigurtà ta’ Malta.
Skontu, l-għan kien li jingħad apposta ċertu kliem fuq telefon li kienu jemmnu li kien qed jiġi interċettat, biex iħawdu lill-investigaturi u possibilment iwaqqfuhom milli jibqgħu jisimgħu.
F’konversazzjoni oħra, Fenech kien qed jagħtih struzzjonijiet dwar x’kellu jgħid lil Degiorgio fuq telefon li Theuma qal li kienu jafu jew jissuspettaw li kien qed jiġi tapped.
Theuma jgħid li kien konvint li Fenech u Schembri riedu joqtluh
F’chat oħra, Theuma jidher f’qagħda ta’ biża’ u ansjetà.
Huwa jistaqsi lil Fenech kif seta’ jagħmel kuntatt ma’ Alfred Degiorgio. Fenech jgħidlu li kien se jixtri mobile b’SIM card barranija u jwassal in-numru fil-ħabs biex isir kuntatt.
Theuma mbagħad jgħid lil Fenech li meta jitkellem miegħu kien iħossu aktar kalm.
Fil-Qorti, iżda, Theuma qal li dik il-konversazzjoni seħħet fi żmien meta hu kien konvint li Yorgen Fenech u Keith Schembri kienu qed jippjanaw biex joqtluh.
Kien f’din l-istess konversazzjoni li Theuma bagħat l-artiklu dwar il-vantaġġ ta’ 80,000 vot għall-Labour u kiteb: “Nittamaw li veru.”
“Naddaf kollox”
Lejn tmiem is-seduta, inqrat chat oħra fejn Fenech jgħid lil Theuma li ma setax jifhem għaliex kien qed jiddubita minnu u jassigurah li kienu se “jirranġaw kollox.”
Fenech jgħidlu wkoll li xi ħaġa kienet se sseħħ “is-Sibt.”
Theuma jistaqsih jekk setax jara li “n-nisa” ma jiġux arrestati jew imdaħħla fil-każ.
Fenech jgħidlu li kien konxju tal-kwistjoni u qed jaħdem fuqha, u jagħtih parir biex “inaddaf kollox.”
Fix-xhieda tiegħu, Theuma qal li dan kien ifisser li jneħħi kemm materjal relatat mal-operat illegali tal-lottu tiegħu kif ukoll ir-recordings li kellu dwar il-qtil ta’ Daphne.
Theuma jgħid ukoll lil Fenech li ma kienx jaf jekk kellux is-saħħa biex jgħaddi minn dak kollu. Fenech jipprova jserraħlu rasu u jgħidlu li kollox kien se jgħaddi u wara setgħu jistrieħu.
“Ma nistax inċaqlaq id-data tal-arrest”
Fl-aħħar skambji li nqraw qabel intemmet is-seduta, Fenech jgħid lil Theuma li kien għadu qed jaħdem biex jipprova jipproteġi “lin-nisa”, iżda jagħtih twissija ċara:
“Ma nistax inċaqlaq id-data tal-arrest.”
Theuma jgħidlu li kien qed jieħu ħafna Ativan, pilloli kontra l-ansjetà, iżda minkejja dan ma setax jorqod.
Huwa jgħid li kien partikolarment imbeżża’ dwar x’jista’ jiġri lis-sieħba tiegħu u lil bintha.
B’hekk intemmet ġurnata oħra twila ta’ xhieda minn Melvin Theuma, li matulha l-ġurati semgħu aktar dwar ir-relazzjoni tiegħu ma’ Fenech, il-biża’ mill-investigazzjoni u mill-arrest, l-użu ta’ recordings bħala forma ta’ protezzjoni u allegati tentattivi biex jiġu mfixkla l-awtoritajiet hekk kif il-każ kien qed jagħlaq fuqhom.
B’hekk tintemm is-seduta tal-lum fil-ġuri ta’ Yorgen Fenech, wara ġurnata oħra twila ta’ xhieda minn Melvin Theuma u eżami ta’ recordings, chats u telefonati.
Matul il-ġurnata, Theuma reġa’ insista li Keith Schembri qatt ma tah flus biex tinqatel Daphne Caruana Galizia, iżda qal li kien isemmih fir-recordings għax dak iż-żmien kien taħt pressjoni kbira u kien jemmen li Schembri kien jgħaddi informazzjoni lil Fenech.
Theuma qal ukoll li Fenech kien jagħtih struzzjonijiet dwar kif jitkellem fuq telefon li kienu jemmnu li qed jiġi interċettat, kif iqarraq b’Johann Cremona, u kif jipprova jħawwad lis-Servizzi tas-Sigurtà.
Fost il-messaġġi li nqraw fil-Qorti kien hemm ukoll wieħed fejn Fenech qal lil Theuma: “Int biss tinkwetani”, bil-witness jispjega li Fenech kien jibża’ li hu seta’ jċedi u jmur għand il-pulizija.
Lejn tmiem is-seduta, il-ġurati semgħu chats li fihom Fenech jgħid lil Theuma biex “inaddaf kollox”, li Theuma qal kien jinkludi kemm materjal marbut mal-lottu illegali tiegħu kif ukoll recordings dwar il-qtil.
F’messaġġ ieħor, Fenech jgħidlu: “Ma nistax inċaqlaq id-data tal-arrest.” Theuma jgħid li dak iż-żmien kien qed jieħu ħafna Ativan u ma setax jorqod minħabba l-biża’ għal sieħbu u bintha.
Aktar kmieni fil-ġurnata, Theuma qal ukoll li r-rapporti dwar 17 Black u allegati ħlasijiet ta’ eluf ta’ ewro kuljum lil kumpaniji marbuta ma’ Keith Schembri u Konrad Mizzi kienu, għalih, indikazzjoni li Fenech kellu l-mezzi biex ikompli jħallas lill-aħwa Degiorgio. Huwa reġa’ qal li, skontu, “kien hemm mandant wieħed biss: Yorgen Fenech.”
Il-ġurnata kienet ukoll immarkata minn argument qawwi dwar recordings diffiċli biex jinftiehmu. L-Imħallef Edwina Grima ċaħdet talba tal-Prosekuzzjoni għall-headphones u saħqet li l-materjal kellu jkun tħejja sew qabel il-ġuri.
F’aktar messaġġi li jinqraw fil-Qorti, Yorgen Fenech jgħid lil Melvin Theuma li kien għadu qed jipprova jara kif jipproteġi “lin-nisa” milli jiddaħħlu fil-kwistjoni, iżda jgħidlu wkoll li ma setax ibiddel id-data tal-arrest.
Theuma jwieġbu li kien qed jieħu ħafna Ativan, pilloli kontra l-ansjetà, iżda xorta ma setax jorqod.
Jgħid li kien imħasseb ħafna dwar is-sieħba tiegħu u bintha.
Il-Prosekuzzjoni taqra chat oħra bejn Melvin Theuma u Yorgen Fenech.
Fil-konversazzjoni, Fenech jgħid lil Theuma li ma setax jifhem għaliex kien qed jiddubita minnu u jassigurah li “se nirranġaw kollox.” Jgħidlu wkoll li xi ħaġa kienet se sseħħ “is-Sibt.”
Theuma jistaqsih jekk setax jara li “n-nisa” ma jiġux arrestati u ma jiddaħħlux fil-kwistjoni. Fenech iwieġbu li kien jaf bis-sitwazzjoni u li kien qed jaħdem fuqha.
Fenech jagħtih ukoll parir biex “inaddaf kollox.”
Aktar tard, Theuma jgħidlu li ma jaħsibx li kellu s-saħħa jiflaħ għal dak kollu. Fenech jipprova jserraħlu rasu, jgħidlu li kollox kien se jgħaddi u li wara setgħu jistrieħu.
Fix-xhieda tiegħu fil-Qorti, Theuma jispjega li meta Fenech qallu biex “inaddaf kollox”, kien qed jirreferi biex ineħħi affarijiet marbuta mal-operat illegali tal-lottu tiegħu, kif ukoll ir-recordings li kellu dwar il-qtil.
Il-Prosekutur Godwin Cini jaqra transcript ta’ chat oħra bejn Melvin Theuma u Yorgen Fenech.
Fil-konversazzjoni, Theuma jgħid li kien qed iħossu ħażin u Fenech jistiednu jmur għandu fir-ranch ta’ Ħaż-Żebbuġ. Wara, it-tnejn jitkellmu wkoll dwar il-lottu.
Theuma jistaqsi lil Fenech kif seta’ jagħmel kuntatt ma’ Alfred Degiorgio, u Fenech iwieġbu li kien se jixtri mobile b’SIM card barranija.
Aktar tard fil-chat, Theuma jgħid lil Fenech li meta jitkellem miegħu kien jikkalma. Fenech imbagħad jgħidlu li kien se jwassal in-numru tas-SIM barranija fil-ħabs biex ikun jista’ jsir kuntatt.
F’parti oħra tal-konversazzjoni, Theuma jibgħat lil Fenech artiklu dwar il-Partit Laburista li kien jinsab 80,000 vot minn fuq, u jikteb li l-Gvern kien se jagħmel inkjesta oħra dwar il-qtil biex, anke jekk hu jkun miet, il-verità xorta toħroġ.
Fix-xhieda tiegħu fil-Qorti, Theuma jgħid li dik il-konversazzjoni seħħet fi żmien meta hu kien konvint li Yorgen Fenech u Keith Schembri kienu qed jippjanaw biex joqtluh.
Il-Qorti tisma’ aktar telefonati rrekordjati marbuta ma’ Melvin Theuma u Yorgen Fenech.
F’waħda minnhom, it-tnejn jidhru qed jitkellmu dwar Theuma li kellu jmur għand Charlene Farrugia Bianco, is-segretarja ta’ Keith Schembri, biex jipprova jsolvi problema li kellu ma’ Enemalta — kwistjoni li Theuma kien diġà xehed dwarha lbieraħ.
F’telefonata oħra jissemma Edgar Brincat, il-Ġojja.
Tindaqq ukoll telefonata oħra bejn Theuma u Brincat. Theuma jinstema’ jgħid kliem fis-sens li “għada naqbad u mmur.”
F’dawn it-telefonati, il-Prosekuzzjoni ma tidħolx fil-kontenut fid-dettall u Theuma jintalab biss jikkonferma l-identità tal-persuni li qed jinstemgħu.
F'messaġġ ieħor, Yorgen Fenech jidher qed jagħti lil Melvin Theuma struzzjonijiet dwar kif kellu jinstema’ waqt il-konversazzjonijiet tiegħu.
Fenech jiktiblu li m’għandux jidher qishom qed jiġġieldu, iżda li t-ton għandu jkun wieħed iebes. F’messaġġ ieħor jgħidlu li b’dan il-mod setgħu jfixklu lil min kien qed jisma’ u jwarrbuh minn fuq il-pista.
Fix-xhieda tiegħu, Theuma jgħid li Fenech kien qed jispjegalu x’għandu jagħmel biex iħawdu lis-Servizzi tas-Sigurtà ta’ Malta u jippruvaw iwaqqfuhom milli jibqgħu jinterċettaw it-telefonati tagħhom.
F’aktar messaġġi li jintwerew fil-Qorti, Yorgen Fenech jidher qed jagħti lil Melvin Theuma struzzjonijiet dettaljati dwar kif kellu jkellem lil Johann Cremona.
Fenech jissuġġerilu biex iċempillu u jagħmilha ta’ rrabjat, jgħidlu li ma setax jaċċetta dak li kien iqis bħala tradiment, u mbagħad jistenna ftit qabel jerġa’ jkellmu.
Skont il-messaġġi, Fenech jgħidlu biex wara jbiddel it-ton u jispjega lil Cremona li fil-fatt ma kien hemm l-ebda tradiment, iżda li l-problema kienet marbuta ma’ ftehim dwar taxis.
Fenech jgħidlu wkoll biex jilgħab l-istorja sew u, jekk se jagħmilha, jipprepara dak li kien se jgħid minn qabel.
Theuma jwieġbu li kien se jikteb kollox bir-reqqa.
Il-Qorti tintwera chat oħra bejn Melvin Theuma u Yorgen Fenech, li fiha t-tnejn jitkellmu dwar kif Theuma kellu jġib ruħu f’telefonata li kienu jemmnu li kienet qed tiġi interċettata.
F’messaġġ, Theuma jgħid li kważi kien ikun aħjar kieku Mario Degiorgio semmieh, biex ikun jista’ jaqta’ kull kuntatt miegħu. Jgħid ukoll lil Fenech li kien iweġġgħu meta dan kien jiġi jagħtih il-flus.
Fenech iwieġbu li kellu “jagħmel il-pass” u jaħseb sew fuq dak li kellu jagħmel. Meta Theuma jgħidlu li għandu jgħidlu x’jagħmel, Fenech jirreferi għal telefonata fuq linja li “qed jisimgħuha”.
Theuma jwieġeb li kieku jieqfu jisimgħuha jkun “sinjal tajjeb ħafna.”
Fenech imbagħad jissuġġerilu kliem li seta’ jgħid fuq it-telefon, fosthom riferiment għal “il-boss”, għal dak li ma kienx “tradiment”, u għal kwistjoni dwar żewġ taxis oħra fil-Hilton.
Fix-xhieda tiegħu, Theuma jgħid li Fenech kien qed jagħtih struzzjonijiet dwar x’kellu jgħid lil Degiorgio fuq telefon li kienu jafu jew jissuspettaw li kien qed jiġi interċettat.
Lura fl-awla
Pawża sal-4:45pm
F’chat ieħor li jintwera fil-Qorti, Yorgen Fenech jikteb lil Melvin Theuma li hu kien l-unika persuna li kienet tinkwetah, u li ħaddieħor ma seta’ jagħmillu ħsara.
Theuma jwieġbu bi kliem li bih ried jurih li seta’ jafdah kompletament, filwaqt li Fenech ikompli jgħidlu li dejjem kien se jżommu miegħu.
Fenech jiktiblu wkoll: “Issa inti ħija, u ibnek huwa ibni.”
F’messaġġ ieħor, Fenech jgħid lil Theuma li jekk jibqa’ sod, ħadd ma jkun jista’ jagħmlilhom xejn.
Fix-xhieda tiegħu, Theuma jispjega li Fenech kien inkwetat li hu seta’ jċedi taħt il-pressjoni u jmur għand il-pulizija.
Il-Prosekuzzjoni turi chat oħra bejn Melvin Theuma u Yorgen Fenech. F’din il-konversazzjoni, Fenech jgħid lil Theuma biex iġib lil ibnu għandu ħalli jilgħab ma’ ibnu, waqt li huma t-tnejn ikunu jistgħu “jitkellmu sew”.
Fix-xhieda tiegħu, Theuma jgħid li aktar kmieni dakinhar hu u Fenech kienu argumentaw fuq it-telefon.
Jispjega li kien għadu kemm sar jaf li Vincent Muscat, il-Koħħu, kien qed jitkellem mal-pulizija, u jfakkar li qal lil Fenech: “Fiex daħħaltni?”
Il-Prosekutur Godwin Cini jinnota wkoll li fil-konversazzjoni Fenech kien attiva messaġġi li jisparixxu wara ħames minuti.
Il-Prosekuzzjoni turi lil Melvin Theuma screenshots ta’ chats ma’ kuntatt imniżżel bħala “Yurgin”, li Theuma jikkonferma li kienu konversazzjonijiet tiegħu ma’ Yorgen Fenech.
F’waħda mill-konversazzjonijiet, Theuma jistaqsi lil Fenech jekk jistax iċempillu wara li ra raġel jgħaddi minn quddiem id-dar u ma ħassux komdu bih. Fenech iwieġbu biex iċempillu u aktar tard jgħidlu biex “iserraħ moħħu”, għax kien tkellem ma’ “sieħbu” dakinhar filgħodu.
Fix-xhieda tiegħu, Theuma jgħid li kien issuspettat li r-raġel li ra kien uffiċjal tas-CID. Jgħid li dan kien żmien il-Karnival, u li l-għada reġa’ rah. Din id-darba Theuma jgħid li mexa warajh, bir-raġel idur mal-blokka u jidħol f’dar.
Meta mistoqsi min kien is-“sieħeb” li għalih kien qed jirreferi Fenech, Theuma jgħid li kien Keith Schembri.
Il-Prosekuzzjoni tgħid li m’għandhiex aktar recordings għal Melvin Theuma.
Il-Prosekutur Godwin Cini jgħid li issa jridu juru lix-xhud numru ta’ ritratti u jistaqsuh dwarhom.
Jindaqq recording ieħor li fih Melvin Theuma jinstema’ jgħid li “Yorgen lagħab il-logħba ma’ Valletta.”
Fix-xhieda tiegħu fil-Qorti, Theuma jispjega li Yorgen Fenech kien jistieden lill-eks Deputat Kummissarju tal-Pulizija Silvio Valletta fir-ranch tiegħu u, skontu, kien jirnexxilu jiġbed minnu informazzjoni dwar l-investigazzjoni.
Theuma għalhekk jerġa’ jallega li Fenech kien qed jirċievi informazzjoni mingħand Valletta matul il-perjodu tal-investigazzjoni.
Jindaqq recording ieħor li fih Melvin Theuma jitkellem dwar pressjoni li, skontu, kien qed jagħmel fuqu Yorgen Fenechqabel il-qtil.
Theuma jispjega li Fenech kien jibqa’ jinsisti miegħu: “Mur għid lil Fredu, mur għid lil Fredu għax se toħroġ l-informazzjoni.” Huwa jgħid ukoll li Fenech kien jgħidlu li anke Keith Schembri kien inkwetat.
Fir-recording, Johann Cremona jinstema’ jgħid lil Theuma li hu kien għamel biss il-parti li jgħaddi l-flus, u li min kien jaf x’kien qed jiġri qatt ma messu għamel dak li għamel.
F’parti oħra, Theuma jinstema’ jgħid: “Keith qiegħed fiha miegħu, żgur.”
Madankollu, fix-xhieda tiegħu fil-Qorti, Theuma jerġa’ jagħmilha ċara li jqis dik ir-referenza għal Schembri bħala “żball”u jerġa’ jiddistingwi bejn dak li kien qed jgħid taħt pressjoni dak iż-żmien u dak li qed jixhed illum.
F’recording li jindaqq fil-Qorti, Melvin Theuma jinstema’ jgħid: “Kont raġel sew, qatt ma semmejt lil Yorgen jew lil Keith magħhom.”
Fix-xhieda tiegħu, Theuma jerġa’ jisħaq li Keith Schembri qatt ma tah flus biex tinqatel Daphne Caruana Galizia.
Jispjega li kien isemmi lil Schembri għax dak iż-żmien kien taħt pressjoni kbira u kien ipoġġih “fl-istess keffa” ma’ Yorgen Fenech, għaliex, skont Theuma, Schembri kien jgħaddi informazzjoni lil Fenech.
Lura fl-awla
L-avukati tad-Difiża jitolbu indikazzjoni ta’ kemm għad fadlilha l-Prosekuzzjoni biex tlesti l-mistoqsijiet tagħha lil Melvin Theuma.
Il-Prosekuzzjoni twieġeb li żgur mhux se tkun lesta sal-aħħar tal-lum, u għalhekk ix-xhieda ta’ Theuma mistennija tkompli aktar ’il quddiem.
L-Imħallef Edwina Grima twaqqaf il-proċeduri għall-waqfa tal-ikel.
Is-seduta se tkompli fit-3pm.
F’parti oħra mir-recording, il-konversazzjoni ddur fuq il-problemi serji li kien qed jiffaċċja Yorgen Fenech.
Johann Cremona jinstema’ jgħid li Fenech ma kienx se jiflaħ il-ħabs. Theuma jwieġeb li, kieku Fenech kellu jinkixef, hu kien jemmen li “jifga lilu nnifsu.”
Il-konversazzjoni mbagħad iddur fuq il-Panama Papers.
Theuma jispjega li saret referenza għal Best Play Limited, kumpanija tal-gaming li jgħid li kienet ta’ Cremona u Fenech u li kienet issemmiet fil-kuntest tal-Panama Papers.
Fir-recording, Cremona jirreaġixxi b’rabja u jgħid li dejjem kien żamm ’il bogħod mill-inkwiet u kien joqgħod attent, iżda li l-involviment tiegħu ma’ Fenech kien daħħlu f’inkwiet serju.
F’recording ieħor, Johann Cremona jinstema’ jgħid lil Melvin Theuma biex, ladarba s-sitwazzjoni tgħaddi, jeħles mill-mobile tiegħu.
Cremona jwissih ukoll biex iżomm id-distanza minn Yorgen Fenech, u jgħidlu li Fenech kien qed ikun taħt aktar skrutinju.
Theuma jgħid lill-Qorti li Cremona kien qallu li l-Europol kien se jaqbad il-mobile ta’ Fenech u jeżamina dak li kien fih.
Ix-xhud iżid li Cremona kien sar jaf li Fenech kien ingħata mobile ġdid permezz ta’ Charlene Bianco Farrugia, is-segretarja ta’ Keith Schembri.
Meta l-Prosekutur Godwin Cini jistaqsi lil Theuma min kien ta l-mobile lil Charlene, ix-xhud iwieġeb: “Probabbilment Keith.”
Melvin Theuma jitkellem dwar dak li jgħid kien żieda fl-użu tal-kokaina minn Yorgen Fenech wara l-qtil ta’ Daphne Caruana Galizia.
Theuma jfakkar okkażjoni meta kkonfronta lil Fenech dwar dak li kien iqis bħala użu dejjem akbar tad-droga, u qallu li “ma kinitx tixraqlu.”
Skont Theuma, Fenech wieġbu li kien jaf x’qed jagħmel u li “ma kienx tifel.”
Meta l-Prosekutur Godwin Cini jistaqsih għaliex kien jemmen li Fenech kien qed juża aktar kokaina wara l-qtil, Theuma jdur lejn l-awla u jgħid:
“Dan mhux qisek qtilt fenek. Qed nitkellmu fuq il-qtil ta’ persuna.”
Theuma jgħid li wara qtil, il-ħajja ta’ persuna tista’ tinħakem mir-rimors, u jżid li hu stess kien abbuża minn pilloli u sustanzi oħra wara l-assassinju.
Fir-recording, Johann Cremona jirreferi għal “klijent” li ma kienx lest jaċċetta sentenza ta’ 12-il sena ħabs.
Fix-xhieda tiegħu, Melvin Theuma jispjega li l-konversazzjoni kienet dwar Vincent ‘Il-Koħħu’ Muscat u l-avukat tiegħu ta’ dak iż-żmien, Arthur Azzopardi. Skont Theuma, Muscat ma kienx lest jaċċetta sentenza ta’ 12-il sena.
Theuma jfakkar ukoll lil Cremona jirreferi għall-investigatur Keith Arnaud, u jgħid kliem fis-sens li ma setax jarresta persuna mingħajr ma jkollu l-provi f’idejh.
Il-mistoqsijiet imbagħad iduru fuq rapporti ppubblikati minn Times of Malta dwar negozjant u persuna marbuta mas-settur tal-gaming li allegatament setgħu kellhom rabta mal-qtil ta’ Daphne Caruana Galizia.
Theuma jinstema’ jgħid li, kieku r-rapport semma lil Yorgen Fenech b’ismu, setgħet tinkixef l-identità tiegħu bħala l-allegat mandant tal-qtil.
Ix-xhud jerġa’ jisħaq li l-fatt li kellu f’idejh ir-recordings sigrieti kien jagħtih ċertu sens ta’ kontroll jew saħħa.
F’parti oħra mir-recording, Theuma jinstema’ jċempel lil xi ħadd u jgħidlu biex iħejji r-recordings sabiex ikun jista’ jmur għand il-pulizija
Qabel waqfa ta’ 15-il minuta, il-Qorti tkompli teżamina aktar siltiet mir-recordings bejn Johann Cremona u Melvin Theuma.
F’waħda mill-konversazzjonijiet, Cremona jinstema’ jgħid lil Theuma: “Il-mediċina huma l-flus.”
Fir-recording issir ukoll referenza għall-Prim Ministru Slovakk ta’ dak iż-żmien. Theuma jispjega li Cremona kien semmielu Prim Ministru Slovakk fil-kuntest tal-qtil ta’ ġurnalist.
Cremona jsemmi wkoll raġel jismu Ramon.
Theuma jgħid li hu qatt ma ddiskuta direttament il-qtil ma’ Ramon. Jispjega li Mario Degiorgio kien qallu li Ramon kien tkellem mal-avukat Arthur Azzopardi dwar il-possibbiltà li titressaq xi forma ta’ rikors jew proċedura fil-Qorti, iżda jgħid li ma kellux aktar informazzjoni dwar dan.
Jinstema' recording ieħor bejn Melvin Theuma u Johann Cremona, li kienu diġà nstemgħu mill-ġurati meta Cremona xehed aktar kmieni fil-ġuri.
F’wieħed mir-recordings, Cremona jgħid lil Theuma: “Jekk isemmuk, semmih.”
Meta l-Prosekutur Godwin Cini jistaqsi lil Theuma lil min kien jirreferi, ix-xhud iwieġeb: “Lil Yorgen, ovvjament.”
Il-Prosekuzzjoni mbagħad tistaqsi lil Theuma dwar ir-riferimenti li kien jagħmel għall-Kummissarju tal-Pulizija fil-konversazzjonijiet tiegħu ma’ Cremona.
Theuma jgħid li fil-fatt kien tkellem mal-Kummissarju darba biss, b’rabta mat-talba tiegħu għall-maħfra presidenzjali. Jgħid ukoll li, skontu, il-Kummissarju kien qed ifittex informazzjoni dwaru permezz ta’ Edgar Brincat, mhux jgħaddilu informazzjoni.
Ix-xhud jammetti li kien isemmi lill-Kummissarju ta’ spiss meta kien jitkellem ma’ Cremona, iżda jgħid li ħafna minn dan kien bluff.
“Kont nippretendi li qed nirċievi informazzjoni mingħand il-Kummissarju,” jgħid Theuma.
Theuma jiġi mistoqsi wkoll dwar kumment ieħor li Cremona jinstema’ jagħmel fir-recordings: “Il-Kummissarju jrid ħafna flus, Melv.”
Ix-xhud jinsisti li l-Kummissarju tal-Pulizija qatt ma talbu flus u qatt ma rċieva flus mingħandu b’rabta mal-maħfra presidenzjali.
Il-Prosekuzzjoni tistaqsi lil Melvin Theuma dwar riferimenti fir-recordings għall-investigazzjoni dwar ħasil ta’ flus u dwar kif, skont il-konversazzjonijiet, Yorgen Fenech ma setax jaċċetta li kien qed jiġi investigat.
Theuma jgħid li ma jafx jispjega kif Fenech seta’ ma jaċċettax il-fatt li kienet għaddejja investigazzjoni fuqu.
Il-Prosekuzzjoni mbagħad iddur fuq parti oħra mir-recordings fejn Theuma jinstema’ jgħid li xtaq ikun jaf jekk Kenneth Camilleri kienx intbagħat minn Keith Schembri.
Theuma jirreferi wkoll għall-fatt li l-avukat Arthur Azzopardi ma baqax jiddefendi lil Vince Muscat, il-Koħħu
Fir-recordings jinstema’ wkoll riferiment għal allegazzjoni li xi ħadd kien bagħat żewġ persuni biex jheddu lil Arthur Azzopardi.
Hekk kif il-Qorti tkompli teżamina r-recording, jissemmew il-power station u 17 Black.
Melvin Theuma jfakkar rapporti li kienu ħarġu dak iż-żmien dwar il-power station u allegazzjonijiet ta’ ħlasijiet ta’ €5,000 kuljum marbuta ma’ Keith Schembri u Konrad Mizzi.
Theuma jgħid li, f’moħħu, dak kollu kien juri li Yorgen Fenech kellu l-mezzi finanzjarji biex ikompli jħallas lill-aħwa Degiorgio.
Ix-xhud jgħid li Fenech kien jirrepetilu: “Il-poter tagħna huma l-flus.”
Fir-recording jerġa’ jissemma Keith Schembri. Theuma jgħid lill-Qorti li dak iż-żmien, minħabba l-istat mentali mħawwad tiegħu, kien ipoġġi lil Schembri “fl-istess dgħajsa ma’ Yorgen”, iżda jinsisti li Schembri qatt ma tah ordni biex jagħmel xi ħaġa u qatt ma tah flus.
“Kien hemm mandant wieħed biss: Yorgen Fenech tat-Tumas Group,” jgħid Theuma.
Theuma jfakkar ukoll parti mir-recording li fiha kien qed jitkellem dwar pressjoni li, skontu, Fenech kien jagħmel fuqu biex jgħid lill-aħwa Degiorgio jipproċedu bil-qtil.
Skont Theuma, Fenech kien jibża’ li jekk Daphne Caruana Galizia tippubblika dak li kienet taf qabel il-qtil, huma jkunu qatluha “għalxejn”.
Qed jinstema' recording ieħor fil-Qorti, din id-darba b’riferimenti għal Mario Degiorgio.
Melvin Theuma jgħid li f’dik il-konversazzjoni Johann Cremona kien qallu biex jirrekordja lil Mario Degiorgio, għalkemm ix-xhud jgħid li ma jiftakarx li fil-fatt għamel recording tiegħu.
Theuma mbagħad jiġi mistoqsi dwar kumment ieħor attribwit lil Cremona: “Għaliex ma ġabx nies minn barra biex joqtluha?”
Meta mistoqsi għal min kien qed jirreferi Cremona, Theuma jwieġeb: “Yorgen Fenech.”
F’parti mir-recording li tinstema’ fl-awla, il-konversazzjoni ddur fuq il-konsegwenzi ta’ dak li kien seħħ. Persuna tistaqsi jekk kinux fehmu x’kien se jiġri, filwaqt li l-oħra twieġeb li kieku kienet taf minn qabel x’kienu se jkunu l-konsegwenzi, ma kinitx tagħmlu.
Aktar tard fir-recording tinstema’ wkoll il-frażi “kien jaf kollox”, li tiġi ripetuta diversi drabi, kif ukoll riferiment għal recordings marbuta ma’ Keith Schembri.
Theuma jgħid li Schembri rrekordjah għal raġuni differenti minn persuni oħra.
“Irrekordjajt lil Keith għax Yorgen Fenech isemmih fir-recordings,” jgħid Theuma. “Ma rrekordjajtx lil Keith bħalma rrekordjajt lill-oħrajn.”
Ix-xhud jinsisti li ltaqa’ ma’ Schembri darbtejn biss: darba fir-ranch ta’ Yorgen Fenech u darba f’Kastilja, b’rabta mal-impjieg mal-Gvern li kien ingħata.
F’parti oħra tar-recording, Theuma jinstema’ jgħid li “jġennuk.”
Meta l-Prosekutur Godwin Cini jistaqsih għaliex kien qal hekk lil Cremona, Theuma jispjega li mingħajr ir-recordings ma kien ikollu ebda mod kif jipprova dak li kien qed jgħid.
“Kieku ma kellix recordings, nista’ ngħid li l-kappillan bagħatni. Min kien se jemminni?” jgħid Theuma.
Huwa jżid li, fil-fehma tiegħu, l-investigaturi kienu emmnu lil Vince Muscat anke mingħajr ma kellu provi ta’ dak li kien qed jgħid.
Melvin Theuma jiġi mistoqsi dwar riferimenti fir-recordings għal esperti Taljani li allegatament kellhom jgħinu lill-aħwa Degiorgio fil-każ tagħhom.
Theuma jfakkar li kien hemm diskors dwar “Taljani” li kienu se “jgħinuhom”, kif ukoll dwar xi ċifra jew somma ta’ flus. Meta l-Prosekutur Godwin Cini jistaqsih jekk qattx intqallu kif dawn l-esperti kienu se jgħinu lill-aħwa Degiorgio, Theuma jwieġeb: “Le, ma qalulix.”
Jindaqq recording ieħor, din id-darba b’Johann Cremona.
Theuma jispjega li kien qal lil Cremona li kien qed jikkunsidra jmur għand il-pulizija u jikxef dak li kien jaf.
Fir-recording, Cremona jinstema’ jgħid, fis-sens, li ma setax iwaqqaf l-istorja f’dak l-istadju, li ma kienx jaf għaliex kien għamilha, u li ma kienx jaf jekk setax jibqa’ jagħtihom dawk il-flus kollha.
Meta Cini jistaqsi lil Theuma għal min kien qed jirreferi Cremona meta qal “ma nafx għaliex għamilha”, ix-xhud iwieġeb: “Yorgen Fenech.”
Jindaqq recording ieħor, u Melvin Theuma jiġi mistoqsi dwar xiex Yorgen Fenech kien ikkunsidra li jiftaħ proċeduri ta’ libell u kemm-il darba kien tkellem dwar dan.
Theuma jfakkar okkażjoni li fiha Fenech kellu l-intenzjoni jieħu azzjoni legali kontra Times of Malta, b’rabta ma’ artikli li kienu qed jiġu ppubblikati dwaru.
Il-Qorti tagħti deċiżjoni dwar l-argument fuq il-mod kif għandhom jinstemgħu r-recordings waqt ix-xhieda ta’ Melvin Theuma.
L-Imħallef Edwina Grima tirrileva li wieħed mill-iskopijiet tal-kumpilazzjoni huwa li l-provi jiġu ppreservati u mqiegħda fl-atti b’mod li jkunu jistgħu jitressqu mingħajr xkiel waqt il-ġuri.
Il-Qorti tgħid li kien fid-dmir tal-Prosekuzzjoni li, qabel il-bidu tal-ġuri, tiżgura li l-provi kollha li kienet biħsiebha tressaq ikunu ppreservati u ppreparati b’mod li jkunu jistgħu jiġu ppreżentati lill-ġurati mingħajr diffikultà.
Tirrimarka li dawn ir-recordings ilhom f’idejn il-partijiet sa mill-bidu tal-proċeduri, u li l-Prosekuzzjoni kellha aċċess kemm għar-recordings kif ukoll għat-transcripts li kienu ġew ordnati mill-Qorti Istruttorja.
Skont il-Qorti, jekk il-Prosekuzzjoni kienet taf li kien hemm recordings diffiċli biex jinftiehmu u li għalihom kien hemm transcripts neqsin, kellha titlob minn qabel li jinħatru traskritturi uffiċjali biex isir ix-xogħol meħtieġ.
L-Imħallef tfakkar ukoll li l-Qorti kienet appuntat diversi seduti preparatorji qabel il-ġuri sabiex il-partijiet jiżguraw li l-provi u d-dokumenti kollha jkunu lesti minn qabel.
Għalhekk, il-Qorti tgħid li l-Prosekuzzjoni ma tistax issa, f’dan l-istadju tal-ġuri, tippretendi li jinħatru esperti jew jiġu pprovduti headphones biex jiġu solvuti problemi li setgħu ġew indirizzati qabel.
Il-Qorti tiddikjara wkoll li ma taċċettax il-kritika kontinwa fil-konfront tal-mod kif qed tmexxi l-proċeduri meta d-deċiżjonijiet tagħha ma jkunux jaqblu ma’ dak li jkunu jridu l-partijiet.
Fid-dawl tal-oġġezzjoni tad-Difiża, u peress li dak li kien qed jisma’ Theuma bil-headphones ma kienx qed jinstema’ fl-awla fil-miftuħ, il-Qorti tiddeċiedi li x-xhud għandu jisma’ r-recordings fil-miftuħ, sabiex il-partijiet kollha jkunu jistgħu jsegwu dak li jkun qed jingħad.
Il-Qorti għalhekk tiċħad it-talba tal-Prosekuzzjoni biex f’dan l-istadju jingħataw headphones lill-ġurati u lill-Qorti, u tgħid li proċedura bħal din tkun qed twassal għal aktar dewmien f’ġuri fejn il-provi kellhom ikunu diġà ppreparati u ppreservati fl-atti.
Waqt li l-partijiet qed jivverbalizzaw l-argument tagħhom dwar il-mod kif qed jinstemgħu r-recordings, il-Prosekuzzjoni ssemmi l-fatt li l-Qorti kienet ċanfritilha aktar kmieni.
F’dan il-punt, l-Imħallef Edwina Grima tirreaġixxi b’mod viżibbilment frustrat u tgħid li “l-Qorti għandha d-dritt li ċċanfar meta trid”, filwaqt li tfakkar li hija l-Qorti li għandha s-setgħa tirregola kif jimxu l-proċeduri.
L-Imħallef iżżid li ddejqet li kull darba li jsir verbal mill-partijiet, dan jispiċċa jinkludi kritika fil-konfront tal-Qorti, u tagħmilha ċara li dan irid jieqaf.
L-avukat tad-Difiża Charles Mercieca jiddetta oġġezzjoni formali għall-mod kif ir-recordings qed jindaqqu lil Melvin Theuma permezz tal-headphones, meta l-bqija tal-awla ma tkunx tista’ tisma’ fl-istess ħin dak li jkun qed jisma’ x-xhud.
Mercieca jargumenta li b’dan il-mod Theuma qed jintalab jispjega materjal li la l-Qorti u lanqas id-Difiża ma jkunu jistgħu jisimgħu direttament miegħu. Skont id-Difiża, il-provi għandhom jingħataw viva voce u fil-miftuħ fl-awla.
Huwa jsostni li s-sitwazzjoni nħolqot minħabba li l-Prosekuzzjoni ma talbitx transcripts tar-recordings meta kellha l-opportunità tagħmel dan. Skont Mercieca, li jindaqqu recordings mingħajr transcript u b’mod li jinstemgħu biss mix-xhud ma jgħinx biex ikun hemm smigħ ġust, u jiddeskrivi l-proċedura bħala waħda inġusta.
Il-Prosekuzzjoni twieġeb li r-recordings huma parti importanti ħafna mill-provi tagħha u li għandha d-dmir tiżgura li l-ġurati jkunu jistgħu jisimgħuhom u jifhmuhom sew.
Targumenta li nuqqasijiet fis-sistema tal-ħoss tal-awla m’għandhomx ifixklu milli l-prova tinstema’ kif suppost, jew iwasslu biex dak li allegatament intqal fir-recordings ma jiġix ikkunsidrat.
Il-Prosekuzzjoni tgħid li f’każ bħal dan, fejn hemm numru kbir ta’ recordings, kull avukat, ġurat u l-Imħallef għandhom ikollhom headphones individwali biex l-awdjo jinstema’ bl-aktar mod ċar possibbli.
Tgħid ukoll li l-Qorti għandha tiżgura li l-ġurati jkollhom it-tagħmir kollu meħtieġ u, jekk ikun hemm bżonn, jinħatru esperti biex inaqqsu jew ineħħu l-ħsejjes fl-isfond tar-recordings
Melvin Theuma ikompli jispjega partijiet mir-recording li qed jisma’ bil-headphones.
Huwa jfakkar referenza għall-investigatur Keith Arnaud, u jgħid li fil-konversazzjoni ntqal li Arnaud “għandu l-kuraġġ jibqa’ jaħdem.”
Theuma jgħid ukoll li Yorgen Fenech qallu: “Int maqbud bejn l-anġli u x-xitan.”
F’parti oħra tal-konversazzjoni, tissemma l-possibbiltà li l-aħwa Degiorgio jaħarbu. Theuma jfakkar li ntqal li “anke l-pulizija kienu jieħdu r-ruħ kieku l-aħwa Degiorgio ħarbu.”
F’dan il-punt, id-Difiża tqajjem punt ta’ liġi dwar il-mod kif ir-recordings qed jinstemgħu biss minn Theuma permezz tal-headphones, biex imbagħad ix-xhud jirrakkonta lill-Qorti x’fehem li ntqal.
Melvin Theuma jerġa’ jieħu postu u jkompli jixhed bilqiegħda, hekk kif jinstema' recording ta’ konversazzjoni bejnu u Yorgen Fenech.
Bħal fil-każ ta’ diversi recordings tal-bieraħ, l-awdjo jibqa’ mħawwad u ħafna minn dak li jingħad diffiċli biex jinftiehem, għalkemm jinstema’ xi kliem vulgari.
Meta l-Imħallef u l-Prosekutur Godwin Cini jistaqsuh x’fehem, Theuma jgħid li minħabba li Keith Arnaud kien qed jinvestiga lill-aħwa Degiorgio, huma kienu “jarawh bħax-xitan.”
Qabel ma jerġa’ jindaqq ir-recording, il-Prosekuzzjoni titlob li Theuma jitħalla jilbes headphones biex jisma’ l-awdjo aktar ċar, u li r-recording jitwaqqaf f’ċerti punti biex ix-xhud ikun jista’ jispjega x’qed jingħad.
Id-Difiża toġġezzjona, billi tirrimarka li jekk Theuma jisma’ bil-headphones, il-bqija tal-awla ma tkunx tista’ tisma’ dak li jkun qed jisma’ hu.
L-Imħallef xorta tippermetti li Theuma jisma’ r-recording bil-headphones. Waqt li dan ikun qed jindaqq lilu, l-awla ma tismax l-awdjo.
Wara li jisimgħu, Theuma jispjega li kien jibża’ li l-aħwa Degiorgio jduru kontrih.
Huwa jfakkar ukoll lil Fenech jgħidlu: “Jekk jien u inti nibqgħu sodi, ma jiġri xejn.”
L-Imħallef Edwina Grima tidħol fl-Awla 22 u mill-ewwel tagħmel twissija ċara lill-Prosekuzzjoni dwar dokumenti u provi li qed jiġu ppreżentati tard.
L-Imħallef tidher iddiżappuntata bil-mod kif qed jintalbu photocopies għall-ġurati fl-aħħar minuta, u tagħmilha ċara li l-Qorti mhix se tibqa’ torganizza kopji filgħodu tas-seduta jew saħansitra filgħaxija ta’ qabel.
Minflok, tgħid li l-ġurati jkollhom isegwu d-dokumenti mit-tablets tagħhom.
Grima tgħid ukoll li kemm hi kif ukoll l-espert tal-Qorti Martin Bajada qed isibuha diffiċli biex ilaħħqu mal-ammont ta’ materjal li qed jiġi ppreżentat.
Twissi lill-Prosekuzzjoni li mhux se jibqa’ aċċettabbli li provi ġodda jitressqu fl-aħħar minuta.
Wara din it-twissija, il-ġurati jidħlu fl-Awla 22.
Kważi nofs siegħa wara l-ħin li fih kienet mistennija tibda s-seduta, il-proċeduri għadhom ma bdewx u s’issa ma ngħatat l-ebda raġuni uffiċjali għad-dewmien.
Minn dak li stajna nosservaw fl-awla, il-Prosekutur Godwin Cini deher jitkellem mal-espert tal-IT tal-Qorti Martin Bajada.
Wara l-problemi tekniċi tal-bieraħ, meta diversi recordings kienu diffiċli biex jinftiehmu, jidher li jista’ jkun għadu għaddej xogħol fuq l-awdjo — iżda dan għadu ma ġiex ikkonfermat mill-Qorti.
L-għodwa t-tajba. Qegħdin lura l-Qorti għal ġurnata oħra fil-ġuri ta’ Yorgen Fenech dwar l-assassinju ta’ Daphne Caruana Galizia.
Ilbieraħ, il-ġurati komplew jisimgħu sensiela twila ta’ recordings sigrieti marbuta max-xhieda ta’ Melvin Theuma, li qal fost l-oħrajn li kien qed iħoss pressjoni finanzjarja dejjem tikber minħabba talbiet għall-flus mill-aħwa Degiorgio.
Matul is-seduta ħarġu wkoll allegazzjonijiet dwar informazzjoni fuq l-interċettazzjoni tal-mobile ta’ Theuma, riferimenti għal Keith Schembri u Silvio Valletta, kif ukoll tħassib ta’ Theuma li kien riesaq lejn l-arrest.
Is-seduta ntemmet wara diffikultajiet biex jinftiehmu xi recordings. Il-Qorti qalet li se jsir tentattiv biex titjieb il-kwalità ta’ parti mill-awdjo qabel ma jitkomplew il-proċeduri llum.
Se nkunu qed insegwu dak kollu li jiġri fl-awla, u nwasslulkom l-aħħar aġġornamenti