Dettalji dwar l-iskema elaborata ta’ frodi li allegatament kienet operata minn Sarah Ann Gatt, mara ta’ 42 sena minn Santa Venera li taħdem bħala cleaner, tressqu quddiem il-Qorti hekk kif aktar vittmi telgħu fuq il-pedana tax-xhieda biex jirrakkontaw kif tilfu eluf ta’ ewro fi flus kontanti għal proprjetajiet tal-gvern li qatt ma kienu jeżistu.
Gatt tinsab akkużata b’frodi, approprjazzjoni indebita, falsifikazzjoni ta’ dokumenti pubbliċi u privati, ksur tal-kondizzjonijiet ta’ sentenzi sospiżi u reċidiva. Il-prosekuzzjoni qed tallega li hi frodata madwar 40 persuna b’total ta’ kważi €500,000 wara li ffalsifikat li d-Dipartiment tad-Djar kien qed ibiegħ proprjetajiet li rritornaw għand il-banek b’prezzijiet imnaqqsin ferm.
Fis-seduta tal-lum il-Qorti semgħet ix-xhieda ta’ tlett itfal tal-vittma Lorraine Falzon.
Id-dettalji li ħarġu fix-xhieda deskrivew kif Falzon, omm ta’ erba tfal, kienet ġiet ikkuntattjata mill-kuġina tagħha li infurmataha b’din l-iskema ta’ djar tal-gvern bi prezzijiet raġonevoli. Peress li kellha bżonn dar akbar għall-familja tagħha, Falzon daħlet f’dan il-patt, u bdiet tgħaddi l-flus kontanti direttament lill-akkużata, li kienet qed tuża ismijiet foloz.
Il-Qorti semgħet li Gatt eventwalment konvinċiet lil Falzon li t-tfal tagħha setgħu jagħmlu l-ħlasijiet tagħhom stess biex jinvestu f’din l-opportunità ta’ akkomodazzjoni.
Bint Falzon xehdet li meta ommha rat ir-rapporti fil-media dwar l-iskamm, baqgħet mifqugħa bil-biki u maħsuda meta ndunat li filwaqt li ħasbet li kienet qed tgħin lit-tfal jibdew ħajjithom fuq saqajhom, hi fil-verita kienet daħlithom f’frodi.
It-tifla xehdet li hi stess kienet għaddiet depożitu inizjali ta’ €4,800 fi flus kontanti, segwit minn ħlasijiet ta’ €500 kull xahar, biex b’hekk it-total tagħha laħaq madwar €8,000. Hija żiedet li temmen li ommha kienet dik li tilfet l-akbar ammont ta’ flus fil-familja, bl-ammont tagħha solitarju jilħaq il-madwar €15,000.
Iben Falzon umbagħad tela’ fuq il-pedana tax-xhieda fejn spjega li hu wkoll kien spiċċa fil-xibka ta’ din l-iskema. Hu kien ħallas depożitu inizjali ta’ €2,000 u wara beda jħallas €200 kull xahar fi flus kontanti, biex eventwalment ħallas ammont ta’ madwar €6,000.
Hu spjega li l-flus kienu dejjem jgħadduh lil persuni bl-ismijiet ta’ "Sue" u "Nadine", ismijiet foloz li l-prosekuzzjoni ssostni li kienu persuni maħluqa minn Gatt stess biex tqarraq bil-vittmi li kienu qed jittrattaw ma’ uffiċjali tal-Awtorità tad-Djar.
Ix-xhud iddikjara li qatt ma ltaqa’ ma’ "Sue" jew "Nadine" wiċċ imb wiċċ u qatt ma ntwerew djar fil-verità, iżda biss ritratti li "Nadine" kienet tibgħatlu fuq il-WhatsApp. Meta ġie mistoqsi mill-Qorti jekk setax jippreżenta n-numru jew l-istorja tal-messaġġi, hu spjega li l-mowbajl il-qadim tiegħu ma kienx għadu jaħdem.
Dokumenti oħra tressqu fil-Qorti bħala evidenza, inkluż karti b’firma ffalsifikata attribwita lil "Nadine."
Ix-xhieda kkonfermaw li sal-lum, la huma u lanqas ommhom ma ngħataw lura xejn mill-flus li ħallsu.
Il-Każ ġie ppresedut mill-Maġistrat Astrid May Grima.
L-Spetturi Shaun Friggieri u Ritianne Gauci mexxew il-prosekuzzjoni, bl-għajnuna tal-Uffiċċju tal-Avukat Ġenerali.
L-Avukati Franco Debono u Marion Camilleri dehru għad-difiża.
.png)
.jpeg)
