Żewġ ċittadini Olandiżi wieġbu mhux ħatja għall-akkużi miġjuba kontrihom meta tressqu l-Qorti b'rabta ma' allegat ċirku ta' traffikar tad-droga.
Ahmed Walid Askarzada ta' 38 sena u Youri Kai Smit ta' 34 sena qed jiffaċċjaw diversi akkużi relatati mat-traffikar u l-pussess ta' sustanzi illegali, kif ukoll b'parteċipazzjoni f'organizzazzjoni kriminali allegata u reati oħra.
Il-prosekuzzjoni spjegat li fit-20 ta' Ġunju uffiċjali mill-Iskwadra tad-Droga kienu qed josservaw il-movimenti ta' Smit. Għall-ħabta tal-10.00am, huwa kien allegatament osservat isuq vettura flimkien ma' Askarzada. Skont il-prosekuzzjoni, it-tnejn dehru jżuru żewġ indirizzi differenti u l-
Pulizija ssuspettat li kienu qed jittrasferixxu oġġetti minn post għall-ieħor.
Wara dawn l-osservazzjonijiet inħareġ mandat ta' arrest u t-tnejn ġew arrestati. Waqt tfittxija f'residenza f'Swieqi, il-Pulizija allegatament sabet madwar 890 gramma amfetamina u 550 gramma ketamina, flimkien ma' kwantitajiet iżgħar ta' sustanzi oħra suspettati.
Il-prosekuzzjoni talbet ukoll sabiex il-Qorti toħroġ ordni ta' ffriżar fuq l-assi tal-akkużati. Għalkemm id-difiża oġġezzjonat, il-Qorti laqgħet it-talba u ħarġet l-ordni.
F'dan l-istadju ma saret l-ebda talba għall-ħelsien mill-arrest u ż-żewġ akkużati baqgħu miżmuma taħt arrest.
Il-prosekuzzjoni tmexxiet mis-Supretendent John Leigh Howard flimkien mal-Avukat tal-Avukat Ġenerali Julian Scicluna. Għall-akkużati dehru l-avukati Adreana Zammit, Franco Debono, Joseph Borda u Jose Herrera.
