Raġel akkużat li stupra tifla ta’ ħames snin

Raġel ta’ 51 sena minn Bormla tressaq il-Qorti akkużat bi stupru ta’ tifla ta’ ħames snin, wara li allegatament instab filmat fuq mobile li juri mġiba sesswali fil-konfront tat-tifla.

Ruben Schembri, impjegat fis-settur tal-iGaming, tressaq il-Qorti nhar il-Ġimgħa wara li omm it-tifla ressqet rapport għand il-Pulizija.

Skont il-prosekuzzjoni, il-mara, li bħalissa qed tgħix f'xelter tal-YMCA fl-Imsida, qalet lill-Pulizija li waqt li kienet qed tuża l-mobile tagħha sabet filmat li allegatament juri lil Schembri jmiss il-partijiet ġenitali ta’ bintha.

Schembri wieġeb mhux ħati tal-akkużi miġjuba kontrih.

Ma saret l-ebda talba għall-ħelsien mill-arrest u, b’hekk, il-Qorti ordnat li jibqa’ miżmum taħt arrest preventiv.

L-akkużat kien assistit mill-avukat tal-għajnuna legali Victor Bugeja, filwaqt li l-prosekuzzjoni tmexxiet mill-Ispettur Ryan Vella flimkien mal-avukat tal-Uffiċċju tal-Avukat Ġenerali Mireya Borg.