Żagħżugħ sofra ġrieħi gravi waqt ġlieda li seħħet il-Ħadd fil-bajja ta’ Golden Bay, u dan wassal biex l-Malta Ranger Unit(MRU) tħeġġeġ għal aktar preżenza tal-pulizija fiż-żona.
L-MRU qalet li r-rangers tagħha raw diversi ġlied fl-aħħar żewġ Ħdud f’din il-bajja popolari, li tifforma parti mill-Majjistral Nature and History Park, żona protetta magħrufa għall-ekosistemi sensittivi tagħha.
Skont l-MRU, f’dawn l-aħħar ġimgħat bdew jinġabru gruppi kbar ta’ żgħażagħ fiż-żona, kif is-soltu jiġri lejn l-aħħar ta’ April. Madankollu, xi wħud minn dawn il-gruppi kienu qed joħolqu problemi u jikkawżaw disturbi.
Il-Ħadd, ir-rangers sabu żagħżugħ midrub fil-parkeġġ, “mgħotti bid-demm”, wara li allegatament sofra ġrieħi f’imnieħru waqt ġlieda. Ir-rangers immedjatament avżaw lill-Rapid Intervention Unit u ċemplu ambulanza.
Il-pulizija waslet malajr fuq il-post. Filwaqt li diversi persuni allegatament involuti ħarbu, wieħed minnhom ġie arrestat.
L-MRU qalet li ressqet rapport dettaljat lill-Malta Police Force, flimkien ma’ evidenza biex tgħin fl-identifikazzjoni ta’ persuni oħra involuti.
Fi stqarrija maħruġa t-Tnejn filgħodu, il-pulizija qalet li raġel ta’ 21 sena sofra ġrieħi waqt ġlieda f’Għajn Tuffieħa għall-ħabta tas-6pm, u ddaħħal l-isptar fejn ġie ċċertifikat li jinsab f’qagħda gravi.
Żagħżugħ ta’ 18-il sena mill- Marsa qed jinżamm taħt arrest biex jgħin fl-investigazzjonijiet, għalkemm għadu mhux ċar jekk dan il-każ huwiex l-istess wieħed irrappurtat mill-MRU.
L-MRU qed tappella lill-awtoritajiet biex iżidu l-preżenza tal-pulizija f’Golden Bay, b’mod partikolari nhar ta’ Ħadd, sabiex jitnaqqsu dawn l-inċidenti.
Ir-rangers wissiew ukoll li dawn id-disturbi qed iseħħu matul il-ġurnata, meta jkun hemm familji preżenti, u li xi individwi qed jagħmlu ħsara lill-ambjent billi jidħlu f’żoni protetti u jħallu skart warajhom.
Fl-aħħar nett, l-MRU awgurat fejqan ta’ malajr liż-żagħżugħ midrub u esprimiet it-tama li s-sitwazzjoni tkun ikkontrollata fil-qrib.
