Nar qawwi ġie rappurtat wara nofsinhar ta’ l-Erbgħa fl-iscrapyard fiż-Żejtun, viċin Triq Tal-Barrani.
Kelliema mid-Dipartiment tal-Protezzjoni Ċivili kkonfermat l-inċident ma’ din il-gazzetta b’uffiċjali diġà fuq il-post qed jaħdmu biex jikkontrollaw il-fjammi.
Filmati mibgħuta lil gazzetta, oħt, MaltaToday juru sħab kbir ta’ duħħan iswed jitla’ mill-inħawi, li kien jidher anke mill Marsa, viċin it-trakka tat-tiġrijiet tal-karozzi.
Il-ħruq ikkawża wkoll konġestjoni kbira fit-traffiku fiż-żona, b’apparat ta’ navigazzjoni bħal Waze diġà jindika traffiku qawwi madwar Triq Tal-Barrani u t-toroq tal-madwar.
F’intervent fil-Parlament aktar tard waranofsinhar, il-Ministru għall-Affarijiet Interni Byron Camilleri kkonferma l-inċident u ddeskriva l-fjammi bħala “kbar ħafna”, b’karozzi u partijiet ta’ vetturi mqiegħda waħda fuq oħra – fattur li qed jagħmilha aktar diffiċli għall-uffiċjali tal-Protezzjoni Ċivili biex jikkontrollaw in-nar.
Il-Ministru Camilleri appella lir-residenti tal-lokalitajiet fil-viċin sabiex jagħlqu t-twieqi u l-bibien, peress li d-duħħan jista’ jkun tossiku.
Il-ħidma tal-uffiċjali qed tkompli biex jintefa in-nar u jiġu evitati aktar ħsarat.
Aktar dettalji fil-ħin li ġej
.png)
