Il-Prim Ministru Robert Abela ddikjara li l-2026 se tkun is-“sena tal-azzar” għal Malta, waqt li kien qed jindirizza lill-Parlament fil-ftuħ tad-dibattitu dwar l-estimi tal-baġit.
Fil-bidu tad-diskors tiegħu, Abela sostna li l-baġit għall-2027 huwa l-aqwa baġit fl-istorja ta’ Malta. Madankollu, immedjatament wara dar biex jikkritika l-baġits imressqa minn gvernijiet Nazzjonalisti preċedenti, li skontu kienu mibnija fuq politiki ta’ awsterità.
Il-Prim Ministru qal li l-aħħar baġits tal-Partit Nazzjonalista kienu kkaratterizzati minn miżuri restrittivi minħabba d-diffikultajiet ekonomiċi wara l-kriżi tal-2008, filwaqt li l-baġits tal-Partit Laburista offrew serħan il-moħħ u stabbiltà lill-poplu, minkejja l-isfidi internazzjonali li faqqgħu mill-2020 ’l hawn.
Abela akkuża lill-Oppożizzjoni li għadha żżomm l-awsterità fil-qalba tal-politika tagħha, u sostna li l-Partit Nazzjonalista m’għandux kredibbiltà f’oqsma ewlenin bħas-settur tal-akkomodazzjoni. Skontu, il-proposti tal-Oppożizzjoni jonqsu milli jindirizzaw il-ħtiġijiet reali tan-nies.
Matul id-diskors tiegħu, il-Prim Ministru kkompara s-sitwazzjoni ekonomika ta’ Malta ma’ dik ta’ diversi pajjiżi Ewropej, fejn qal li qed tiżdied id-diffikultà finanzjarja għall-familji. Huwa saħaq li l-ekonomija Maltija qed tibqa’ reżiljenti grazzi għall-politiki tal-gvern Laburista.
Abela kompla jinsisti li l-baġits tal-PL għenu lil dawk li, skontu, kienu minsija minn amministrazzjonijiet Nazzjonalisti, fosthom il-pensjonanti u persuni vulnerabbli oħra.
B’ħarsa lejn il-futur, il-Prim Ministru ħabbar li fil-jiem li ġejjin il-gvern se jkun qed iniedi l-viżjoni strateġika “Maltavision 2050”, li mistennija tistabbilixxi d-direzzjoni fit-tul tal-pajjiż.
Huwa semma wkoll inizjattivi li bħalissa qed jitwettqu mill-gvern, fosthom l-għoti ta’ laptops b’xejn lill-istudenti u l-ħolqien ta’ spazji miftuħa ġodda. Fid-diskors tiegħu, Abela qal li “prosperità ġdida qed issejħilna”, filwaqt li tenna l-impenn tal-gvern biex ikompli jinvesti fil-kwalità tal-ħajja tan-nies.
