Il-PN jiftaħ il-kunsill ġenerali amministrattiv

Il-Partit Nazzjonalista fetaħ il-Kunsill Ġenerali Amministrattiv tiegħu nhar il-Ġimgħa filgħaxija fid-Dar Ċentrali taħt it-tema “Dan hu l-mument”, slogan li oriġinarjament kien parti mill-kampanja ta’ tmexxija ta’ Alex Borg, iżda issa sar il-messaġġ ewlieni tal-partit kollu.

Fil-kliem ta’ Alex Perici Calascione, Viċi Kap tal-PN, dan is-slogan “evolva f’messaġġ li qed iħossu mhux biss il-partit iżda wkoll il-poplu Malti u Għawdxi.”

Perici Calascione fakkar f’tliet mumenti kruċjali fl-istorja tal-PN li, skontu, komplew jiffurmaw l-identità u l-missjoni tiegħu: il-ġrajjiet ta’ Black Monday tal-1979, l-assassinju ta’ Daphne Caruana Galizia, u l-ħatra tal-Kap il-ġdid Alex Borg, li hu ddeskriva bħala “mument ta’ tama ġdida għal pajjiżna.”

Huwa tenna li llum il-PN qed joffri tmexxija bbażata fuq rikkonċiljazzjoni, serjetà u prinċipju, bil-missjoni li jerġa’ jqajjem it-tama tan-nies.

“Il-Maltin u l-Għawdxin iridu paċi tal-moħħ, rispett u dinjità f’kull stadju ta’ ħajjithom,” qal Perici Calascione. “Jixtiequ pajjiż li jerġa’ jpoġġi l-ġustizzja, l-ambjent u l-familja fiċ-ċentru tal-ħsieb politiku.”

Huwa appella lill-membri tal-partit biex jaħdmu b’għaqda u kuraġġ, sabiex “dan il-mument tal-partit isir mument għan-nazzjon kollu – mument li jġib lura l-fiduċja u d-dinjità li Malta u Għawdex jistħoqqilhom.”

Il-kunsill infetaħ b’diskors mill-President tal-Kunsill Ġenerali Mark Anthony Sammut, segwit mill-qari tal-minuti tal-aħħar laqgħa mill-Eżekuttiv Organizzattiv. Il-laqgħa, li saret taħt it-tema “Malta Żagħżugħa”, rat interventi minn diversi kelliema fosthom il-MPs Ivan Castillo, Stanley Zammit, Ivan Bartolo, Graziella Galea, Jerome Caruana Cilia u George Vital Zammit, kif ukoll Michael Piccinino, Ċensu Galea, Ylenia Montfort, Thomas De Martino, Dione Borg u Lara Marie Agius.

Charles Bonello, Segretarju Ġenerali tal-PN, ippreżenta mozzjoni li tinkludi r-rapport amministrattiv fuq l-attivitajiet tal-partit matul l-aħħar sena, li se jiġi approvat mill-kunsill.

Saru wkoll elezzjonijiet biex jintgħażlu 18-il rappreżentant ġdid tal-Kunsill Ġenerali li se jservu fuq il-Kumitat Eżekuttiv tal-PN, b'34 kandidat jikkontestaw għal dawn il-postijiet.

Il-Kunsill Ġenerali tal-PN ikompli nhar il-Ħadd filgħodu fid-9:30am, u jintemm b’diskors ewlieni mill-Kap tal-Partit, Alex Borg.

Il-lista sħiħ tal-kandidati eletti, fl-ordni kif ġew eletti skont l-ammont ta' voti li kisbu:

Lista tal-Irġiel:

1. David Borg
2. Michael Piccinino
3. Joseph Grech
4. David Bonello
5. Mario Rosso
6. Mauro Miceli

Lista tan-Nisa:

1. Veronica Perici Calascione
2. Lisa Spiteri
3. Michela Dalli
4. Cynthia Galea
5. Marisa Vella Fonde
6. Marthese Cassar

Lista taż-Żgħażagħ:

1. Nicole Zammit
2. Michela Caruana
3. Karen Scerri
4. Nikolai Vella

Lista ta' Għawdex:

1. Beppe Galea
2. William Vella