PN jakkuża lil PBS b’partiġġjaniżmu qabel l-iskeda l-ġdida ta’ TVM

Fi stqarrija li ħarġet il-Ħadd, il-PN qal li l-programmi ta’ diskussjoni se jkunu ppreżentati minn persuni li huma jew marbuta mill-qrib mal-Partit Laburista jew li għandhom karigi ta’ fiduċja f’entitajiet tal-gvern.

Il-partit sostna li dan qed idgħajjef ir-rwol tal-istazzjon bħala xandara għall-Maltin u l-Għawdxin kollha, u minflok qed inaqqasha għal “Super One 2”, f’referenza għall-istazzjon tal-Partit Laburista.

“Dan ikompli joffendi l-intelliġenza tal-poplu Malti u Għawdxi, li jistħoqqlu kontenut kritiku u oġġettiv fil-qasam tal-kurrenti u d-diskussjoni politika fuq ix-xandir nazzjonali,” qal il-PN.

L-Oppożizzjoni wiegħdet li se tressaq il-każ quddiem l-Awtorità tax-Xandir biex tiżgura li PBS tirrispetta l-Kostituzzjoni, speċjalment fid-dawl ta’ elezzjoni ġenerali li tista’ toqrob. Hija insistiet li l-istazzjon nazzjonali m’għandux jaġixxi bħala “noticeboard tal-gvern Laburista”.

Filwaqt li wegħdet li tibqa’ viġilanti, il-PN qal li se jkompli jipparteċipa fil-programmi ta’ TVM sabiex “jaġixxi ta’ tarka għall-poplu Malti u jiżgura li l-verità kollha tixxandar”.

L-istqarrija ntemmet bil-wegħda li gvern Nazzjonalista fil-futur jerġa’ jagħmel minn PBS xandar “għall-poplu kollu ta’ Malta u Għawdex,” ħieles minn influwenza tal-gvern u partiġġjaniżmu.