Il-Partit Nazzjonalista jgħid li l-Gvern qiegħed biss “taparsi jikkonsulta” fuq riforma proposta fit-tqassim tal-pjanifikazzjoni, u jerġa’ jappella biex il-proposti ta’ liġijiet fil-parlament jitneħħew.
Il-ħolqien ta’ kumitat interministerjali biex jiġbor il-fehmiet dwar il-proposti ta’ liġijiet hija “farsa” biex jagħti l-impressjoni li l-Gvern qiegħed jagħmel konsultazzjoni, qalet il-PN nhar il-Ġimgħa.
Il-kelliema tal-Oppożizzjoni Stanley Zammit u Rebekah Borg insistew li kienet biss wara pressjoni qawwija minn gruppi ambjentali u mill-PN li l-Gvern waqqaf milli jġib dawn il-liġijiet quddiem il-parlament.
Madankollu, il-PN sejħet dan il-pass tentattiv ta’ “manipulazzjoni” biex tiġi assigurata l-approvazzjoni tal-liġijiet proposti mill-Gvern meta l-parlament jerġa’ jiltaqa’.
“Li kieku l-Gvern verament ried jagħmel konsultazzjoni kif suppost, u mhux konsultazzjoni farsa, kien jara li dan il-working committee jinkludi lil dawk li qed isemmgħu leħinhom kontra dawn il-liġijiet li ressaq kif ukoll esperti f’dan il-qasam” qalu d-deputati tal-PN.
Żiedu jgħidu: “Mhux persuni fil-Gvern stess li kienu responsabbli għall-istess liġijiet li qajmu daqstant kontroversja – kif qed jgħidulu wkoll esponenti tal-Labour stess bħal Edward Zammit Lewis, u l-għaqdiet ambjentali nfushom.”
Zammit Lewis esprima kritika miftuħa dwar il-kompożizzjoni tal-kumitat f’post fuq Facebook nhar il-Ħamis, u qal li se jieħu naħa tal-poplu u jsegwi mill-qrib il-ħidma tal-kumitat.
Fuq kollox, il-kelliema tal-PN qalu li l-Gvern diġà ammetta li ma jkunx hemm ftehim ma’ għaqdiet. “Tant hu hekk li l-Gvern diġà jaf li mhux se jintlaħaq qbil mal-eNGOs u filwaqt li l-konsultazzjoni għadha se tibda, diġà ddikjara li se jkun hemm affarijiet li l-għaqdiet ambjentali mhux se jaqblu magħhom. Dan juri biċ-ċar li l-Gvern mhux dispost ibiddel punti kruċjali fil-liġi li ħolqu kontroversja.”
Il-kelliema qalu li l-PN mhux se jippermetti lill-Gvern jagħmel “konsultazzjoni taparsi” bħala mezz biex jimponi l-pjanijiet tiegħu.
“Il-Partit Nazzjonalista jemmen f’konsultazzjoni vera u mhux f’konsultazzjoni sfurzata, bil-kundizzjonijiet, u għal għajn il-media, biex il-Gvern ikun taparsi għamel xi ħaġa ħalli mingħalih itaffi xi ftit mir-rabja tan-nies u tal-għaqdiet li ħarġu kontrih,” qal il-PN.
Insistew li l-PN hu lest jiddiskuti mal-Gvern il-kwistjonijiet li qed ibatu lill-pubbliku. “JJekk il-Gvern verament jemmen f’konsultazzjoni ta’ veru, għandu jiżgura li ssir konsultazzjoni anke ma’ min jirrappreżentah u allura għandu jikkonsulta b’mod serju wkoll mal-Oppożizzjoni,” żiedu jgħidu l-kelliema.
Insistew li l-proposti ta’ liġijiet għandhom jiġu “rtirati minnufih” u għandha ssir konsultazzjoni sinifikanti.
Il-Ħamis li għadda, il-Gvern ħabbar li kumitat interministerjali mmexxi mill-Kap tas-Segretarjat tal-OPM Mark Mallia se jiltaqa’ ma’ għaqdiet biex jiġbor il-fehmiet tagħhom. Fl-istess ħin, bdiet ukoll konsultazzjoni pubblika ta’ xahar. Il-kumitat jinkludi l-ministri Ian Borg, Clint Camilleri, Owen Bonnici, Miriam Dalli u Jonathan Attard.
.jpeg)
.jpg)
