Il-Partit ADPD akkuża lill-awtoritajiet Maltin, b’mod partikolari lill-Awtorità tal-Ippjanar, li qed jiffaċilitaw l-anarkija fl-iżvilupp tal-art f’Malta, fejn skont il-partit, il-liġijiet qegħdin jinkisru kontinwament u l-irregolaritajiet jiġu regolarizzati b’mod sistematiku.
F’konferenza stampa li saret quddiem l-uffiċini tal-Awtorità tal-Ippjanar fil-Furjana, id-Deputat Chairperson ta’ ADPD, il-Perit Carmel Cacopardo, qal li l-mod kif l-awtoritajiet qed jimxu fil-qasam tal-iżvilupp hu frott ta’ attitudni mifruxa li tħalli lill-persuni jibnu kif iridu, u wara jsibu mezz biex jirranġaw. “L-Awtorità tal-Ippjanar naqset milli twettaq l-obbligi tagħha u ppermettiet li l-irregolaritajiet jakkumulaw, bħal fil-każ tal-kumpless Montekristo ta’ Charles Polidano,” qal Cacopardo.
Hu żied jgħid li l-fatt li politiċi organizzaw attivitajiet f’dan il-kumpless – minkejja li l-irregolaritajiet kienu magħrufa sew – bagħat messaġġ pubbliku li dan kien aċċettabbli. “Il-preżenza tagħhom hemmhekk kienet pressjoni indiretta favur l-illegalità,” saħaq.
Cacopardo sostna li dan mhux każ iżolat ta’ trattament preferenzjali, iżda pjuttost jirrifletti modus operandi li ilu fis-seħħ. Hu rrefera għall-proċess ta’ regolarizzazzjoni bħala mekkaniżmu li jippermetti l-bini bla permess jinqeda’ b’multi, fejn kollox jiġi "irranġat". “Din hija anarkija normalizzata,” insista.
Min-naħa tagħha, iċ-Chairperson ta’ ADPD, Sandra Gauci, qalet li istituzzjonijiet li suppost jaħdmu kontra l-iżvilupp illegali qed saħansitra jinkoraġġuh. Gauci fakkret fl-aħħar ftehim dwar is-Suncrest ta’ Anġlu Xuereb, fejn art pubblika nżammet bla titlu għal 38 sena u issa ġie permess l-użu tagħha permezz ta’ multa ta’ €2 miljun. “Mhux biss ġie sanzjonat l-abbuż, imma wkoll inħareġ mid-dritt pubbliku għall-aċċess tul il-kosta,” qalet.
Gauci saħqet li dan kollu juri li l-governanza tajba teżisti biss fuq il-karta u li l-prijoritajiet ta’ dawk fil-poter huma l-profitti qabel il-liġi. “Qed ngħixu f’ambjent fejn l-irregolaritajiet jinfdew bil-flus, u l-korrettezza saret aspettattiva mhux mistennija,” insistiet.
Hi kkonkludiet billi appellat għal bidla reali fl-attitudni tal-istituzzjonijiet: “Dak li hu ħażin ġie normalizzat. Mhux biżżejjed li jkollna riformi fuq il-karta – irridu awtoritajiet b’sinsla u impenn għal ġustizzja vera.”
ADPD appellaw għal governanza b’saħħitha, fejn il-liġijiet jiġu infurzati b’mod ġust u bla favuri – u fejn l-iżvilupp iseħħ f’kuntest ta’ serjetà u rispett lejn l-ambjent u l-interess pubbliku.
