L-Awtorità tax-Xandir (BA) ikkonkludiet li l-PBS naqset milli żżomm bilanċ u imparzjalità fir-rapportar tagħha dwar miżuri tat-traffiku mħabbra mill-gvern, wara lment imressaq mill-Partit Nazzjonalista.
Fid-deċiżjoni tagħha, li ġiet ippubblikata llum, il-BA qalet li l-PBS falliet fit-twettiq tar-responsabbiltà tagħha bħala xandar nazzjonali, partikolarment meta żammet lura r-reazzjoni tal-Oppożizzjoni għal miżuri ġodda relatati mat-traffiku mħabbra f’rapport estensiv.
Il-każ kien imressaq mill-Partit Nazzjonalista, rappreżentat mill-avukat Michael Piccinino, wara li fl-aħbarijiet tal-8:00pm tal-29 ta’ Marzu, PBS xandret rapport ta’ tmien minuti dwar il-miżuri l-ġodda tat-traffiku iżda r-reazzjoni tal-PN ġiet imbuttata għal ħafna wara, u b’hekk ġiet separata kompletament mill-istqarrija tal-Prim Ministru.
Skont il-BA, dan wassal biex l-udjenza ma tingħatax stampa kompluta u bilanċjata tal-kwistjoni, u b’hekk in-nuqqas ta’ kuntrast immedjat bejn il-pożizzjoni tal-gvern u dik tal-Oppożizzjoni kiser il-prinċipji ta’ ġustizzja u imparzjalità fil-kopertura ta’ suġġett ta’ interess pubbliku.
L-awtorità saħqet li l-importanza mhix biss fin-numru ta’ rapporti mxandrin, iżda l-aktar fil-ħin u l-kuntest li fih jittrattaw temi politiċi jew ta’ kurrenti. F’dan il-każ, ir-reazzjoni tal-PN ġiet imxandra b’mod iżolat u mhux f’kuntest dirett mal-istqarrijiet tal-gvern, u dan naqqas il-piż tar-reazzjoni tal-Oppożizzjoni fil-għajnejn tal-pubbliku.
Bħala rimedju, l-BA ordnat lill-PBS biex fi żmien jumejn jaqra sommarju tad-deċiżjoni bħala parti mill-ewwel sezzjoni tal-bulletin tal-aħbarijiet.
Fi stqarrija, il-Partit Nazzjonalista kkritika l-aġir tal-PBS u qal li se jibqa’ jieħu kull pass neċessarju biex jiżgura li l-istazzjon ma jibqax jaġixxi bħala "Super One 2", imma jibda jopera bħala xandar veru ta’ servizz pubbliku.
