Joseph Muscat jiddeskrivi dak żvelat fil-midja bħala 'frame-up'
Muscat iddeskriva dak li ġie żvelat fil-midja bħala "frame-up" u stqarr li min huwa warajha se "jieħdu li ħaqqhom u toħroġ il-verità"
17 ta' Mejju 2023 11:48
minn Matthew Farrugia
minn Matthew Farrugia
Joseph Muscat ċaħad li għamel xi ħaġa ħażina b’rabta ma’ rapporti li jixhdu kif, wara li rreżenja minn Prim Ministru, huwa ħadem għal kumpanija marbuta mal-ftehim tal-isptarijiet. Dan wara li ġie żvelat li l-kontijiet bankarji ta’ Muscat qed jiġu investigati minħabba pagamenti li għandhom x’jaqsmu mal-ftehim tal-isptarijiet.
Huwa mifhum li Muscat kellu kuntratt ta’ konsultazzjoni ma kumpanija fl-Isvizzera li setgħet intużat sabiex jingħaddu fondi marbuta mal-ftehim.
L-Erbgħa filgħodu, il-gazzetta Maltatoday staqsiet lil Muscat dwar il-fatt li kumpanija li kien jirċievi l-flus mingħanda kien jisimha VGH Europe. VGH hija l-kumpanija li l-Gvern leħaq qbil magħha sabiex tieħu f’idejha l-konċessjoni tal-isptarijiet fl-2015.
Fi tweġiba tiegħu, Muscat qal li huwa ma jibżax mill-arrest, u ddeskriva dak li ġie żvelat bħala “frame-up”. Qal li x-xogħol li għamel wara li rreżenja minn Prim Ministru kien kollu dokumentat, u ċaħad li qatt irċieva flus minn korruzzjoni.
Ftit tal-ħin wara, Joseph Muscat kiteb fuq Facebook, fejn iddeskriva dak li ħareġ fil-midja bħala “attakk konċentrat min-nies tas-soltu”, u qal li ta l-evidenza li kellu jagħti lill-Maġistrat ikkonċernata meta ntalab biex jagħti x-xhieda tiegħu.
Huwa allega wkoll li qed jiġu żvelati ċertu dettalji li jkissru l-fiduċja fl-istituzzjonijiet, hekk kif kien ġara meta ġie żvelat li kien qed iseħħ raid fuq id-dar tiegħu.
Muscat tenna li “Min qed jivvinta se jkollu jħallas ta' għemilu bil-ġustizzja”, u li se jara li dawn in-nies "jieħdu li ħaqqhom u toħroġ il-verità."
More in Politika
