Aktar karozzi misruqa fil-Kanada interċettati u kkonfiskati fil-Freeport ta' Malta

Id-Dwana interċettat u kkonfiskat aktar karozzi li nsterqu mill-Kanada u li nstabu moħbija f’kontejners li kienu għadhom kemm waslu Malta.

Fil-fatt, fl-aħħar siegħa, instabu u ġew ikkonfiskati 12-il vettura oħra biex hekk it-total ilaħħaq l-24 karozza. Dawn il-vetturi kienu abbord bastimenti li waslu Malta iżda li kienu fi triqithom lejn Abu Dhabi.

Fi stqarrija, id-Dwana spjegat li l-Pulizija fil-Kanada identifikat grupp kriminali u wettqet numru ta’ rejds u arresti. Dan wara l-informazzjoni li rċeviet minn Malta u li kkonfermat li l-karozzi kollha li ġew ikkonfiskati kienu misruqa.

Waqt ir-rejds, jidher li nstabu aktar vetturi misjuqa, informazzjoni dwar it-tbaħħir u anke ammont ta’ flus.

Jidher li ukoll li żewġ vetturi li laħqu waslu Malta u ġew ikkonfiskati kienu misruqa bi vjolenza. 

L-istess investigazzjoni waslet biex jiġu identifikati numru ta’ kontejners oħra b’vetturi misruqa li kienu lesti biex jiħallu l-Kanada.

Dalgħodu, l-awtoritajiet fil-Kanada rringrazzjaw lid-Dwana Maltija għal din l-operazzjoni. 

Din hija l-lista tal-vetturi kollha li nsterqu u li nstabu Malta:

• Sitt Lexus RX350; 
• Ħames Ford pick-ups F450; 
• Tliet Ford Expedition SUV; 
• Żewġ Jeep Grand Cherokee SUV;
• Żewġ Mercedes G63 
• Jaguar F-pace; 
• Mustang;
• Ford 150; 
• Range Rover Velar; 
• Jeep Rubicon; u
• Honda CRV.