Il-Kamra għall-Kummerċ tappella lill-awtoritajiet biex jirrevedu l-miżuri tal-kwarantina

Il-Kamra għall-Kummerċ qed tħeġġeġ lill-awtoritajiet tas-saħħa biex issa li 81% tal-popolazzjoni hija mlaqqma kompletament, jirrevedu l-miżuri dwar il-kwarantina biex jieħdu inkonsiderazzjoni t-tilqim.

Fil-fatt, il-Kamra qed tisħaq li ma jagħmilx sens li persuni mlaqqma jitpoġġew fi kwarantina meta ma jkunux ġew f'kuntatt dirett ma' persuni li huma mlaqqma. Fi stqarrija, insistew li l-impjegaturi qed ibatu u jidħlu fi spejjeż, speċjalment meta l-impjegati ma jkunux jistgħu jaħdmu mid-dar.

Il-Kamra qalet li taf b'każi ta' familji sħaħ li spiċċaw fi kwarantina ta' 14-il ġurnata wara li wieħed minn uliedhom, li ħa l-ewwel doża, ġie f'kuntatt ma' persuna pożittiva għall-virus waqt Skola Sajf. "Dan ma jagħmilx sens," kompliet l-istqarrija.

"Jekk vera nemmnu fil-vaċċin u li dan ikisser il-katina tal-infezzjoni, allura għandna nkunu pragmatiċi u ma nitfgħux lil kulħadd f'keffa waħda," insista.

Kompliet tisħaq li ma jagħmilx sens lanqas li impjegaturi qed iħeġġu lill-impjegati biex jitlaqqmu u mbagħad, l-awtoritajiet, mhux qed jitrattaw lill-impjegati mlaqqma differenti minn oħrajn li ma ħadux it-tilqima.

Għamlet ukoll referenza għall-fatt li fuq perjodu ta' ġimgħa, jekk wieħed jieħu l-medja, l-għadd ta' pazjenti li qed ikollhom bżonn kura fl-isptar qed jibqa' inqas minn 0.8% tat-total tal-każi attivi.