Cyrus Engerer fuq quddiem biex jieħu post Miriam Dalli fi Brussell

Cyrus Engerer jidher illi jinsab fuq quddiem f'termini ta' voti biex jieħu post Miriam Dalli li dalgħodu kien irrappurtat fuq il-Maltatoday illi aċċettat li tkun co-opted fil-Parlament minflok Joseph Muscat li rriżenja minn Deputat tat-tieni distrett il-ġimgħa l-oħra. 

Naturalment Engerer ikun irid jitfa' ismu għal elezzjoni li issa trid issir biex jimtela' post Dalli.

Fl-elezzjoni tal-2019 Miriam Dalli kienet kisbet l-akbar numru ta' voti mill-kandidati kollha ta' din l-elezzjoni.  Fil-fatt hija kisbet 63,438 vot b'Roberta Metsola warajha imma b'ħafna inqas voti:  38,000 vot. 

Engerer kiseb 5,394 vot fl-ewwel għadd filwaqt illi wiret 2,200 vot minn Dalli li ġiet eletta mal-ewwel għadd.  

Qabel Engerer ġew eletti Alfred Sant li kiseb 26,592 vot fl-ewwel għadd u wiret 10,527 mingħand Dalli, Alex Agius Saliba li kien elett b'18,808 voti u li wiret 4,463 vot minn Miriam Dalli, filwaqt li r-raba' persuna li kienet eletta f'isem il-Partit Laburista kienet Josianne Cutajar li ġiet eletta bi 15,603 voti fl-ewwel għadd u li wirtet 5,661 vot minn Dalli  

Fir-rapport tagħha dalgħodu l-gazzetta Maltatoday qalet illi mhuwiex ċar liema portafoll jew responsabilità se tingħata Dalli fil-Gvern.