Aktar minn 60,000 persuna jniżżlu l-App ‘Covid Alert Malta’ f’ġimgħa

Total ta’ 62,303 persuni niżlu l-App ‘Covid Alert Malta’ li l-għan tagħha huwa li tgħin fil-contact tracing li huwa tant meħtieġ biex tkun ikkontrollata l-imxija tal-Covid-19.

Qal dan, mal-gazzetta ILLUM, is-Segretarju Parlamentari għall-Ekonomija Diġitali, Clayton Bartolo li fakkar kif din l-app mhux se tkun qed tieħu post il-contact tracing manwali, iżda se tkun qed tgħin ħafna biex l-awtoritajiet tas-saħħa jkunu jistgħu mill-aktar fis, jiddentifikaw persuni li jkunu setgħu ġew esposti għall-virus.

Waqt li ħeġġeġ biex aktar persuni jniżżlu l-App, huwa fakkar li din tirrispetta l-liġi tal-GDPR u l-privatezza tal-persuna.

Fil-fatt, din tuża l-Bluetooth mingħajr ma tiġbor informazzjoni personali, bħall-isem tal-persuni li tuża l-App.

Permezz tal-App, persuna tkun infurmata f’każ li tkun għamlet ‘il fuq minn ħmistax-il persuna f’kuntatt qrib ma’ persuna li aktar tard tirriżulta pożittiva għall-virus.

Fi kliem sempliċi din l-App taħdem hekk:

• Persuna tniżżel l-App. 
• L-APP iżżomm id-dettalji ta’ mowbajls oħra li jkunu viċin tiegħek, jiġifieri inqas minn żewġ metri ‘l bogħod u li tkun għamilt aktar minn 15-il minuta ħdejhom.
• F’każ li persuna, li tkun għamilt ħin twil viċin tagħha, tirriżulta pożittiv għall-Covid-19, din l-App se tkun qed tinfurmak li inti stajt kont espost għall-virus.
• Dan ifisser li din taħdem ukoll meta inti ma tkunx taf lill-persuna li tkun irriżultat pożittiv, għax permezz tal-bluetooth, din iżżomm id-dettalji tal-mowbajls l-oħra kollha li jkunu viċin tiegħek għal aktar minn kwarta.
• Jekk tkun innotifikat, għandek iżomm għajnejk miftuħa għal sintomi u anke titlob biex tagħmel it-test.
• L-għan tal-App huwa li tgħin fil-contact tracing li huma importanti mmens biex tkun ikkontrollata l-imxija.
• L-App inħadmet skont il-liġi tal-GDPR u hija tirrispetta totalment il-privatezza.