Fl-aħħar 24 siegħa, Malta rreġistrat 39 każ ġdid ta' Covid-19 filwaqt li fiequ wkoll 18-il pazjent, biex issa l-għadd tal-każi attivi huwa ta' 621.
B'kollox, ilbieraħ, saru 2,632 test.
Intant bħalissa hemm żewġ pazjenti li jinsabu fit-Taqsima tal-Kura Intensiva.
Apparti dawn, f'Mater Dei hemm 19-il pazjent ieħor, għaxra jinsabu fl-Isptar Boffa u 12 fl-isptar St. Thomas.
Is-Supretendent tas-Saħħa Pubblika, Charmaine Gauci, spjegat ukoll kif fl-aħħar ġimgħa, il-każi fid-djar tal-anzjani żdiedu b'117-il każ.
Fil-fatt, kompliet tiela' wkoll l-età medja tal-pazjenti pożittivi bil-Covid-19, li issa hija dik ta' 58 sena. Is-Supretendent fakkret li l-anzjani huma l-aktar vulnerabbli u għalhekk appellet biex dawn ikunu protetti.
Għalkemm l-għadd massimu ta' persuni li jistgħu jinġabru fi grupp huwa ta' 15, Gauci appellat biex kemm jista' jkun il-gruppi jkunu iżgħar għax aktar ma jkun kbir il-grupp, aktar jiżdied ir-riskju.
Appellat ukoll biex kemm jista' jkun, meta grupp ta' persuni jiltaqgħu, dawn jibqgħu fuq barra, anke f'gallarija jew bitħa, għax hemm inqas riskju li l-virus ikun trasmess.
Meta kienet qed tagħti ħarsa lejn l-aħħar grafika, il-Professur Gauci spjegat kif wara li Malta kienet laħqet quċċata fit-tieni mewġa, kollox qed jindika li l-każi reġgħu bdew jiżdiedu. Saħqet li din hija sitwazzjoni simili għal dik li qed tiżviluppa f'pajjiżi oħra Ewropej.
