Il-PN se jlaqqa' Konferenza Ġenerali illi fiha se jkun iddeterminat il-Kunsilliera tal-partit x'jaħsbu. Jew li t-tesserati jmorru għal vot ta' fiduċja jew inkella t-tesserati jerġgħu jivvutaw f'elezzjoni ġdida għal Kap tal-Partit Nazzjonalista. Dan jidher li huwa xi forma ta' kompromess bejn iż-żewġ mozzjonijiet: Dik ta' Delia li titlob illi l-Kunsill Ġenerali jiddeċidix li jmur għal vot ta' fiduċja fih u dik tar-ribelli dwar kif jekk Adrian Delia jkun sfiduċjat fil-Kunsill Ġenerali ssir elezzjoni ġdida għal Kap Nazzjonalista.
Iktar qabel l-Kap tal-Oppożizzjoni u tal-Partit Nazzjonalista Adrian Delia ħabbar li se jimbotta proċess biex jmur għand in-nies - it-tesserati - u jħalli lilhom jiddeċiedu dwar il-futur tiegħu.
Id-Deputat Michael Asciak - eks Deputat Nazzjonalista u eks Sindku ta' Birkirkara - ressaq mozzjoni biex il-Kunsill Ġenerali jisfiduċja lil Delia u minflok issir elezzjoni għal Kap Nazzjonalista ġdid.
Fost dawk li opponew bil-qawwi vot ta' fiduċja f'Delia u favur elezzjoni ġdida għal Kap Nazzjonalista hemm Chris Said, Karol Aquilina, Hermann Schiavone, Beppe Fenech Adami u Claudio Grech.
Il-mozzjoni tar-ribelli tgħid hekk:
MOZZJONI FIL-KUMITAT EŻEKUTTIV
Il-Kumitat Eżekuttiv tal-Partit Nazzjonalista jirriżolvi li jlaqqa’ l-Kunsill Ġenerali tal-Partit Nazzjonalista f’sessjoni plenarja nhar il-Ġimgħa 31 ta’ Lulju 2020 mis-6.00 p.m. sat-8.00 p.m., nhar is-Sibt 1 ta’ Awwissu 2020 mid-9.00 a.m. sas-7.00 p.m. bħala l-jum tal-votazzjoni u nhar l-Erbgħa 29 ta’ Lulju 2020 mill-4.00 p.m. sad-9.00 p.m. bħala l-jum ta’ votazzjoni bikrija, esklussivament b’din l-aġenda:
MOZZJONI
Wara d-deċiżjonijiet meħuda mill-Kumitat Eżekuttiv u mill-Grupp Parlamentari tal-Partit Nazzjonalista li bihom esprimew li m’għandhomx fiduċja fil-Kap tal-Partit Nazzjonalista u fil-Kap tal-Oppożizzjoni rispettivament, il-Kunsill Ġenerali issa jirriżolvi li Adrian Delia m’għadux igawdi l-fiduċja tal-Kunsill Ġenerali tal-Partit Nazzjonalista u jiddeċiedi li jibda l-proċess biex jiġi elett Kap tal-Partit Nazzjonalista mit-tesserati skont il-proċeduri li jipprovdi l-Istatut tal-Partit Nazzjonalista.
IVA (favur il-mozzjoni)
LE (kontra l-mozzjoni)
(Dan l-artiklu qed ikun aġġornat)
