Aġġornata | Każ wieħed importat ta' COVID-19 ... wasal abbord titjira ta' ripatrijazzjoni

Fl-aħħar 24 siegħa, hekk kif saru 981 test, irriżulta każ wieħed ġdid ta' COVID-19, liema każ huwa wieħed importat. 

Fi stqarrija, l-Air Malta spjegat kif dan il-pazjent wasal Malta abbord titjira ta' ripatrijazzjoni minn Amsterdam u rriżulta pożittiv wara li għamel it-test ftit wara li wasal Malta.

"Il-linja tal-ajru tagħti pariri lill-passiġġieri kollha biex jagħmlu swab test malli jaslu lura Malta," saħqet l-istqarrija.

L-Air Malta insistiet għalhekk li dan il-każ ma kienx marbut mal-ftuħ tal-ajruport fl-1 ta' Lulju. Immedjatament beda l-contact tracing kif isir il-każi l-oħra. 

Ittieħdu l-passi kollha biex l-ajruplan ġie ddiżinfettat.

Intant, persuna oħra fieqet biex hekk l-għadd tal-każi attivi f'Malta baqa' ta' 13-il persuna.