Anthony Debono, ir-raġel tal-eks Ministru Nazzjonalista Giovanna Debono mistenni jiteressaq il-Qorti t'Għawdex akkużat li uża l-budget ministerjali fuq xogħlijiet privati għall-kostitwenti.
Debono, ħaddiem taċ-ċivil li kien qed jaħdem fid-diviżjoni tal-proġetti fil-ministeru t'Għawdex waqt li martu kienet fil-kariga ta' Ministru, huwa allegat li uża riżorsi pubbliċi għal kuntratturi privati, sabiex ikunu jistgħu jagħmlu xogħlijiet għall-kostitwenza għal ftit jew l-ebda spiża.
Dan kollu nħareġ propju meta whistleblower baqa' ma tħallasx ta' xogħlijiet li kien għamel. Il-kuntrattur qal li staqsa lil Debono għall-flus, imbagħad lill-ufficjali tal-PN, inkluż is-segretarju ġenerali Chris SSaid u l-mexxej tal-partit Simon Busuttil, sabiex jitlobhom ħlas tax-xogħol li kien sar.
Wara din l-allegazzjoni, tliet kuntratturi Għawdxin oħra għamlu allegazzjonijiet simli - fejn qalu li tqabbdu mill-Ministeru t'Għawdex biex jagħmlu xogħlijiet fil-kostruzzjoni għal residenzi privati jew negozji.
Il-mara ta' Debono, l-eks ministru Giovanna Debono ċaħdet li kienet taf b'dan kollu.
