Joseph Farrugia, magħruf aħjar bħala l-Farell, huwa l-persuna li se jieħu post Karmenu Vella fil-Parlament Malti wara li Vella issa qiegħed bħala Kummissarju Ewropew.
L-għadd tal-voti beda dalgħodu fid-9am.
Il-Farell kien membru Parlamentari waqt il-leġislatura li damet biss 22 xahar, bejn l-1996 u l-1998.
Post Vella kienu qed jissieltu għalih Edric Micallef, Mario Calleja, Robert Henry Bugeja u Anthony Zammit. Zammit kien l-aħħar wieħed li baqa' jissielet ma' Farrugia fit-taqtigħa.
L-eks Membru Parlamentari Anthony Zammit, kien qiegħed fuq quddiem sat-tielet għadd. Iżda mbagħad il-Farell, li ma kienx fis-sala tal-għadd tal-voti, fin-Naxxar, rebaħ b'1985 vot, 86 iżjed mill-Professur Zammit.
