Ġie ffirmat aġġornament ta’ Memorandum ta’ Qbil (MtQ) bejn il‑Bank Ċentrali ta’ Malta, l‑Awtorità tal-Istatistika ta’ Malta u l‑Uffiċċju Nazzjonali tal-Istatistika. Dan l-MtQ jiffoka fuq l-iskambju ta’ informazzjoni statistika u kooperazzjoni msaħħa fil-qasam tal-istatistika ekonomika u finanzjarja.
Il‑firmatarji tal‑qbil huma l-Gvernatur tal‑Bank Ċentrali ta’ Malta, il-Professur Edward Scicluna, il‑President tal‑Awtorità tal‑Istatistika ta’ Malta, Dr Carl Camilleri, u d-Direttur Ġenerali tal‑Uffiċċju Nazzjonali tal-Istatistika, Etienne Caruana.
L-MtQ jibni fuq kooperazzjoni professjonali li ilha teżisti bejn il‑Bank Ċentrali ta’ Malta u l‑Uffiċċju Nazzjonali tal-Istatistika. Dan jinkludi provvedimenti xierqa li jkopru firxa wiesgħa ta’ oqsma statistiċi li fihom l-entitajiet jikkollaboraw sabiex jissodisfaw il-mandati nazzjonali u internazzjonali tagħhom. Fost l-oħrajn, dawn l-oqsma jinkludu l-qsim u t-trasferiment ta’ data u reġistri statistiċi, l-iskambju ta’ għarfien u riżorsi, u l-issodisfar ta’ rekwiżiti statistiċi mtejba fil-livell Ewropew u internazzjonali.
Permezz tal-MtQ, l-istituzzjonijiet jimpenjaw ruħhom ukoll li jżommu l-ogħla standards statistiċi filwaqt li jsaħħu wkoll il-kooperazzjoni fis-sistemi ta’ informazzjoni statistika u l-infrastruttura tal-IT.
Matul dan l-avveniment, Caruana enfasizza l-importanza strateġika ta’ kollaborazzjoni msaħħa bejn l-Uffiċċju Nazzjonali tal-Istatistika u l-Bank Ċentrali ta’ Malta. Enfasizza li l-iskambju ta’ data strettament għal skopijiet ta’ statistika huwa essenzjali biex jittejbu l-kwalità u l-puntwalità tal-istatistika uffiċjali.
Caruana esprima s-sodisfazzjon tiegħu għall-progress li sar f’dawn l-aħħar snin, filwaqt li nnota li s-sħubija ssaħħet b’mod konsiderevoli. Dan l-isforz konġunt huwa ggwidat mill-prinċipji tal-produzzjoni ta’ riżultati statistiċi aktar robusti u l-konformità mal-prinċipju ta’ darba biss.
Camilleri rrimarka li l-iffirmar ta’ ftehimiet sussegwenti huwa xhieda tal-kooperazzjoni li għaddejja bejn iż-żewġ istituzzjonijiet. Enfasizza li l-iskambju tal-informazzjoni u l-għarfien espert huwa essenzjali fl-ekonomija globalizzata u mgħaġġla tal-lum.
Scicluna nnota li “dan il-ftehim ser ikompli jsaħħaħ il-kollaborazzjoni bejn il-Partijiet, irawwem l-iskambju ta’ data ta’ statistika kruċjali u jappoġġja titjib kontinwu fil-kwalità u l-istandard.
.png)
