Seba’ persuni mietu b’suwiċidju f’Lulju li għadda – l-iżgħar kellha 14-il sena

Il-Ministru Glenn Bedingfield żvela ċ-ċifri fil-Parlament wara mistoqsija tad-Deputata Nazzjonalista Graziella Attard Previ

Seba’ persuni mietu b’suwiċidju f’Malta matul Lulju li għadda, bl-etajiet tagħhom ivarjaw bejn l-14 u l-64 sena.

Dan ħareġ minn informazzjoni li l-Ministru għall-Intern Glenn Bedingfield ressaq fil-Parlament nhar it-Tnejn, bi tweġiba għal mistoqsija parlamentari tad-Deputata Nazzjonalista Graziella Attard Previ.

Aktar kmieni din is-sena, fil-Parlament kien ġie żvelat li matul l-ewwel sitt xhur tal-2026 kienu ġew irreġistrati 19-il mewta b’suwiċidju.

Dan ifisser li, meta jingħaddu s-seba’ każijiet ta’ Lulju, in-numru ta’ mwiet b’suwiċidju matul l-ewwel seba’ xhur tal-2026 tela’ għal 26.

B’paragun, matul is-sena kollha tal-2025 kienu ġew irreġistrati 30 mewta b’suwiċidju.

Fejn wieħed jista’ jfittex l-għajnuna

Persuni li għaddejjin minn diffikultajiet ta’ saħħa mentali jew li għandhom bżonn appoġġ emozzjonali jistgħu jfittxu għajnuna mingħand diversi servizzi.

Fost dawn hemm il-linja nazzjonali għall-għajnuna fis-saħħa mentali fuq 1579, ir-Richmond Foundation fuq 1770, u l-linja ta’ appoġġ tal-Fondazzjoni għas-Servizzi ta’ Ħarsien Soċjali fuq 179.

Wieħed jista’ wkoll jitkellem ma’ professjonisti permezz tas-sit Kellimni.com.

Victim Support Malta toffri servizzi ta’ prevenzjoni tas-suwiċidju u appoġġ terapewtiku, inkluż għall-familjari ta’ persuni li mietu b’suwiċidju, fuq 2122 8333.

Is-servizzi ta’ għajnuna msemmija huma offruti mingħajr ħlas, filwaqt li d-disponibbiltà tagħhom tista’ tvarja. F’każ ta’ periklu immedjat, wieħed għandu jċempel 112.

More in Kronaka