B’kollox se jkun hemm 1,864 post vakanti fl-iskejjel tal-Knisja f’Malta u Għawdex għas-sena skolastika 2027-2028, skont ir-regolamenti tad-dħul ippubblikati mill-Arċidjoċesi ta’ Malta.
Minn dawn, 1,624 post jinsabu fl-iskejjel tal-Knisja f’Malta, filwaqt li 240 post ieħor huma disponibbli f’Għawdex.
L-applikazzjonijiet kollha se jsiru online, bl-ewwel fażi tibda nhar il-Ħamis 12 ta’ Novembru 2026.
Ir-regolamenti, flimkien mal-lista tad-dokumenti meħtieġa u d-dettalji tal-proċess, jinsabu fuq il-website tal-Arċidjoċesi, knisja.mt.
Meta jistgħu japplikaw il-ġenituri?
L-applikazzjonijiet se jintlaqgħu f’fażijiet differenti, skont il-kriterji li taħthom ikunu eliġibbli t-tfal.
| Kategorija |
Dati tal-applikazzjoni |
| L-ewwel kriterju |
12-19 Novembru 2026 |
| Appikazzjonijiet tard tal-ewwel kriterju |
26 ta' Novembru - 3 ta' Diċembru 2026 |
| Applikanti oħra |
28 ta' Jannar - 4 ta' Frar 2027 |
| Applikazzjonijiet tard tal-appikanti l-oħra |
11 - 18 ta' Frar |
Il-ġenituri huma mħeġġa jiċċekkjaw ir-regolamenti biex ikunu jafu taħt liema kriterju għandhom japplikaw u liema dokumenti jridu jippreżentaw.
1,624 post vakanti f’Malta – l-aktar fl-ewwel sena tal-primarja
F’Malta, il-proċess tad-dħul fl-iskejjel tal-Knisja jkopri l-ewwel u t-tieni sena tal-kindergarten, l-ewwel sena tal-primarja u l-ewwel sena tas-sekondarja.
L-akbar għadd ta’ postijiet vakanti huwa fl-ewwel sena tal-primarja, b’662 post, segwiti minn 449 post fit-tieni sena tal-kindergarten.
It-tabella turi kif huma mqassma l-postijiet disponibbli għas-sena skolastika 2027-2028.
| Livell edukattiv |
Subien |
Bniet |
Total |
| L-ewwel sena kindergarten |
95 |
96 |
191 |
| It-tieni sena kindergarten |
87 |
362 |
449 |
| L-ewwel sena primarja |
311 |
351 |
662 |
| L-ewwel sena sekoondarja |
238 |
84 |
322 |
| Total |
731 |
893 |
1624 |
Dawn iċ-ċifri jinkludu kemm postijiet għall-istudenti mainstream kif ukoll postijiet għal tfal li jaqgħu taħt il-kriterju tal-każijiet serji.
Min jista’ japplika taħt l-Ewwel Kriterju?
F’Malta, l-applikazzjonijiet taħt l-Ewwel Kriterju jinkludu tfal li jgħixu fi djar tal-Knisja, ulied impjegati tal-iskejjel tal-Knisja u tas-Segretarjat għall-Edukazzjoni Kattolika, kif ukoll aħwa ta’ studenti li jistgħu jinkitbu fl-istess skola ta’ ħuthom.
Jinkludu wkoll tfal li diġà jattendu skejjel tal-Knisja iżda li m’għandhomx kontinwità awtomatika għall-istadju edukattiv li jmiss.
Se jiġu allokati wkoll postijiet għal tfal li jaqgħu taħt il-kriterju tal-każijiet serji, li għalihom japplikaw regolamenti speċifiċi.
Dawn jinkludu tfal li għandhom jew se jkollhom bżonn l-għajnuna ta’ Learning Support Educator (LSE), każijiet soċjali u tfal li qed ifittxu ażil.
Il-proċess għal dawn il-każijiet isir b’mod parallel mal-applikazzjonijiet l-oħra.
240 post vakanti fl-iskejjel tal-Knisja f’Għawdex
F’Għawdex, il-proċess tad-dħul ikopri l-ewwel sena tal-kindergarten u l-ewwel sena tas-sekondarja.
B’kollox hemm 240 post disponibbli, maqsuma kif ġej:
| Livell edukattiv |
Postijiet vakanti |
| L-ewwel sena kindergarten |
96 |
| L-ewwel sena sekondarja |
144 |
| Total |
240 |
Mill-144 post fl-ewwel sena tas-sekondarja, 72 huma għas-subien u 72 għall-bniet.
L-Ewwel Kriterju f’Għawdex jinkludi tfal li jinsabu fis-sitt sena primarja fi skejjel tal-Knisja f’Għawdex, ulied impjegati tal-iskejjel tal-Knisja f’Malta u Għawdex u tas-Segretarjat għall-Edukazzjoni Kattolika, kif ukoll aħwa li jistgħu jinkitbu fl-istess skola.
Jinkludi wkoll każijiet soċjali, tfal li qed ifittxu ażil u applikanti mill-Għasri.
Dawn l-applikazzjonijiet jistgħu jsiru kemm għal tfal mainstream kif ukoll għal dawk li jeħtieġu l-għajnuna ta’ LSE.
Aktar minn 4,000 applikazzjoni f’Malta s-sena li għaddiet
Id-domanda għall-postijiet fl-iskejjel tal-Knisja kienet għolja wkoll matul il-proċess tad-dħul għas-sena skolastika 2026-2027.
Skont is-Segretarjat għall-Edukazzjoni Kattolika, f’Malta kienu waslu 4,009 applikazzjonijiet għal 1,683 post disponibbli f’livelli edukattivi u skejjel differenti.
F’Għawdex, ġew irreġistrati 284 applikazzjoni għal 240 post vakanti.
Kemm il-proċess tal-polza kif ukoll ir-reġistrazzjoni fl-iskejjel kienu saru online.
Għas-sena skolastika 2027-2028, in-numru totali ta’ postijiet vakanti naqas minn 1,923 għal 1,864, jiġifieri 59 post inqas mis-sena ta’ qabel.
Il-ġenituri li jixtiequ japplikaw jistgħu jikkonsultaw ir-regolamenti sħaħ fuq il-website tal-Arċidjoċesi ta’ Malta.
.png)
