Dan l-artiklu aġġornat bir-reazzjoni tal-arċidjoċesi
L-Għaqda Mużikali San Leonardu A.D. 1858 akkużat lill-Kappillan ta’ Ħal Kirkop li naqas mir-responsabbiltà tiegħu li jħares oġġetti sagri fil-parroċċa, wara li diversi relikwi, fosthom waħda ta’ San Leonardu Abbati, instabu nieqsa mill-knisja.
Fi stqarrija, l-Għaqda qalet li ġiet infurmata nhar il-Ħadd 13 ta’ Settembru li għadd ta’ relikwi kienu neqsin mill-Knisja Matriċi ta’ Ħal Kirkop.
Skont l-Għaqda, il-Kappillan ġie infurmat immedjatament u qal li kien se javża lill-awtoritajiet ekkleżjastiċi u jistenna struzzjonijiet ulterjuri mingħandhom, inkluż dwar jekk kellux isir rapport lill-Pulizija.
Fil-frattemp, il-Kappillan ordna li l-bqija tar-relikwi jitqiegħdu b’mod sigur f’safe.
L-Għaqda qalet li aktar tard ġiet infurmata li r-rapport lill-Pulizija sar nhar il-Ħamis 17 ta’ Settembru, erbat ijiem wara li kienet ġiet skoperta n-nuqqas tar-relikwi. Minn dakinhar, qalet li ma rċeviet ebda informazzjoni oħra dwar żviluppi fil-każ.
L-organizzazzjoni spjegat li kienet għażlet li ma tikkummentax pubblikament waqt il-festa prinċipali tal-parroċċa, b’rispett lejn il-festa u lejn il-komunità.
Madankollu, issa li l-festa għaddiet, l-Għaqda qalet li hemm numru ta’ kwistjonijiet li għandhom jiġu indirizzati.
Hija sostniet li, minbarra r-responsabbiltajiet spiritwali u pastorali tiegħu, il-Kappillan għandu wkoll id-dmir li jiżgura li l-oġġetti sagri u l-patrimonju reliġjuż tal-parroċċa jinżammu u jiġu mħarsa kif jixraq.
L-Għaqda qalet li, fil-fehma tagħha, il-Kappillan “naqas bil-kbir” f’dan ir-rigward.
Skont l-istqarrija, ir-relikwi kienu jinżammu f’relikwarju mal-ħajt biswit l-altar ta’ San Leonardu li ma kienx jissakkar, u għalhekk setgħu jkunu aċċessibbli.
L-Għaqda argumentat li l-miżuri ta’ sigurtà kellhom jittieħdu qabel ma ġie skopert l-għibien tar-relikwi, u mhux biss wara.
Hija saħqet ukoll li, fin-nuqqas ta’ sagristan, ir-responsabbiltà għall-patrimonju reliġjuż tal-parroċċa taqa’ fuq il-Kappillan u mhux fuq persuni li jgħinu fil-knisja b’mod volontarju.
L-aħħar darba li, skont l-Għaqda, sar użu mir-relikwa nieqsa ta’ San Leonardu kienet fis-6 ta’ Novembru 2025, waqt il-festa liturġika tal-qaddis. Wara din l-okkażjoni, ir-relikwa reġgħet tqiegħdet fil-post fejn kienet tinżamm is-soltu.
L-Għaqda żiedet li l-aħħar darba li taf li ntuża r-relikwarju nnifsu kienet f’Lulju 2026.
Il-klabb tal-banda kkritika wkoll il-fatt li għaddew erbat ijiem qabel sar rapport lill-Pulizija, u sostna li dan kellu jsir minnufih wara li ġie skopert l-għibien.
Fl-istqarrija saret ukoll referenza għall-2017, meta, skont l-Għaqda, l-awtoritajiet ekkleżjastiċi kienu attendew funzjonijiet reliġjużi marbuta mal-kranju insinji ta’ San Leonardu. L-Għaqda staqsiet għaliex, f’dan il-każ, ittieħdu erbat ijiem biex jiġi deċiż li jsir rapport lill-Pulizija.
Minkejja l-kritika tagħha, l-Għaqda għamlitha ċara li mhix qed takkuża lil ebda persuna bl-għibien tar-relikwi.
“Fin-nuqqas ta’ provi konkreti, ma hi qed tipponta subgħajha lejn ħadd,” qalet.
Fl-istess waqt, insistiet li trid kontabbiltà mingħand kull min, fil-fehma tagħha, naqas milli jwettaq ir-responsabbiltajiet tiegħu.
L-Għaqda temmet tgħid li l-prudenza u s-silenzju tagħha matul il-jiem tal-festa m’għandhomx jiġu interpretati bħala dgħufija, filwaqt li rringrazzjat lil dawk kollha li qed jgħinu biex il-każ jiġi solvut.
L-Arċidjoċesi tikkonferma li r-relikwi nsterqu u tgħid li ma kien hemm l-ebda sinjal ta’ sgass fir-relikwarju.
L-Arċidjoċesi ta’ Malta kkonfermat li sar rapport fl-Għassa tal-Pulizija taż-Żurrieq dwar is-serq ta’ numru ta’ relikwi mill-Knisja Parrokkjali ta’ San Leonardu Abbati f’Ħal Kirkop, u li bħalissa għaddejja investigazzjoni.
Fi stqarrija, l-Arċidjoċesi qalet li r-relikwi kienu jinżammu fir-relikwarju wara l-altar maġġur tal-knisja u li ma kien hemm l-ebda sinjal ta’ sgass.
Qalet ukoll li, wara li ġie vverifikat li r-relikwi kienu tassew neqsin u ma kinux ġew imċaqalqa lejn xi post ieħor fil-knisja, il-Kappillan għamel rapport lill-Pulizija, kif kien meħtieġ minnu f’ċirkostanzi bħal dawn.
L-Arċidjoċesi kkundannat dak li ddeskriviet bħala “att sagrilegu u kriminali” u ngħaqdet mal-appell tal-Kappillan ta’ Ħal Kirkop biex ir-relikwi jiġu rritornati lill-Knisja.
.png)
.png)
