Id-Deputat Mexxej tal-Partit Laburista u MEP Alex Agius Saliba ġie interrogat mill-Pulizija bħala parti minn investigazzjoni dwar allegati irregolaritajiet fil-proċess ta’ procurement marbut ma’ kuntratt għal servizzi ta’ marketing u komunikazzjoni għall-uffiċċju tiegħu fil-Parlament Ewropew.
Fost il-persuni l-oħra investigati hemm il-Kap Eżekuttiv ta’ Servizzi Ewropej Malta, Roderick Zerafa, l-eks sieħeb fin-negozju tiegħu Darryl Farrugia, l-accountant Kenneth Swaine u l-eks assistenta ta’ Agius Saliba, Christine Catania Bonello.
Zerafa, Farrugia, Swaine u Catania Bonello ġew interrogati mill-Pulizija wara li ġew arrestati l-Ħamis, filwaqt li Agius Saliba ġie interrogat il-Ġimgħa.
Skont rapport tat-Times of Malta, l-investigazzjoni tiffoka fuq servizzi pprovduti minn Red Agency Limited, kumpanija li qabel kienet ko-proprjetà ta’ Zerafa u Farrugia.
Fl-2020, Red Agency ntgħażlet minn fost tliet quotations biex tipprovdi servizzi ta’ marketing u komunikazzjoni lill-uffiċċju ta’ Agius Saliba. L-investigaturi qed jeżaminaw jekk xi wħud mill-quotations l-oħra setgħux oriġinaw mill-istess sors.
Skont ir-regoli tal-Parlament Ewropew, l-MEPs jistgħu jqabbdu service providers għal servizzi speċjalizzati, iżda għal kuntratti li jaqbżu l-€60,000 iridu jintalbu quotations minn tal-inqas tliet providers differenti.
Agius Saliba qal li Red Agency kienet inizjalment tqabbdet direttament fuq kuntratt li kien taħt il-limitu ta’ €60,000. Wara li dak il-kuntratt skada, qal li nbeda proċess ġdid ta’ procurement għall-bqija tal-mandat tiegħu bħala MEP, b’quotations mitluba minn tliet kumpaniji.
Huwa insista li s-servizzi kollha mniżżla fil-kuntratt twettqu u li l-evidenza relattiva kienet ingħatat lill-Parlament Ewropew.
F’filmat ippubblikat il-Ġimgħa, Agius Saliba ċaħad kull għemil ħażin u ddeskriva l-investigazzjoni bħala “frame-up politiku”, filwaqt li allega li r-rapport anonimu li wassal għall-investigazzjoni kien ġej mill-uffiċċju tal-President tal-Parlament Ewropew Roberta Metsola.
Kelliem għal Metsola ċaħad l-allegazzjoni, u qal li din hija “assolutament mhux vera”. Huwa żied li Metsola hija legalment prekluża milli tikkummenta aktar dwar investigazzjonijiet possibbli minħabba l-obbligi ta’ kunfidenzjalità tal-kariga tagħha.
Darryl Farrugia u Roderick Zerafa wkoll ċaħdu l-allegazzjonijiet u qalu li Red Agency kienet wieġbet għas-sejħa għal quotations b’rieda tajba u fuq l-istess termini bħal kull parteċipant ieħor.
Huma sostnew li s-servizzi kollha li tħallsu għalihom kienu effettivament ingħataw u qalu li qed jikkooperaw mal-Pulizija.
