Il-provvista tal-elettriku qed terġa’ tidħol gradwalment f’diversi lokalitajiet f’Għawdex wara li Enemalta lestiet it-tiswijiet fuq il-ħsara fil-cable fix-Xewkija.
Il-kumpanija qalet li l-provvista se terġa’ tidħol f’fażijiet hekk kif jitlesta l-proċess b’mod sigur.
Enemalta żiedet tgħid li x-xogħol fuq it-tieni ħsara fil-cable tul ir-rotta f’Kemmuna qed javvanza, u issa beda wkoll it-tħaffir fuq il-post.
Dan wara li eluf ta’ Għawdxin ilhom mingħajr elettriku mis-7pm tal-Ġimgħa, wara li seħħew ħsarat f’żewġ cables ta’ vultaġġ għoli fix-Xewkija u f’Kemmuna waqt mewġa ta’ sħana qawwija.
Il-Ġimgħa filgħaxija, Enemalta kienet ikkonfermat ħsarat kbar fi tnejn mit-tliet cables ta’ 33kV li jfornu lil Għawdex bl-elettriku minn Malta. Waħda miż-żewġ substations tal-gżira kienet ukoll ġarrbet ħsarat.
Timijiet tekniċi ntbagħtu Għawdex matul il-lejl tal-Ġimgħa biex jidentifikaw il-postijiet fejn kienu seħħew il-ħsarat.
L-ewwel ħsara nstabet aktar tard dik il-lejla f’cable taħt l-art ta’ 33kV fix-Xewkija, filwaqt li t-tieni ħsara ġiet lokalizzata f’Kemmuna s-Sibt filgħodu.
Diversi generators kienu wkoll mobilizzati biex tingħata provvista temporanja f’numru ta’ lokalitajiet.
Enemalta spjegat li l-identifikazzjoni u t-tiswija ta’ ħsarat f’cables taħt l-art ta’ vultaġġ għoli tista’ tkun kumplessa, fost l-oħrajn minħabba li dawn il-cables jistgħu jestendu għal diversi kilometri.
It-timijiet tekniċi għadhom fuq il-post, filwaqt li qed jiġu mobilizzati aktar riżorsi hekk kif ix-xogħol fuq it-tieni ħsara jkompli.
