Eluf ta’ Għawdxin u turisti qattgħu l-lejl mingħajr elettriku wara ħsarat f’żewġ cables ta’ vultaġġ għoli li jfornu lil Għawdex mill-gżira ta’ Malta, hekk kif il-pajjiż għaddej minn mewġa ta’ sħana.
Il-problemi bdew il-Ġimgħa filgħaxija, meta Enemalta kkonfermat ħsarat kbar fi tnejn mit-tliet cables ta’ 33kV li jwasslu l-elettriku lejn Għawdex. Saritilha wkoll ħsara waħda miż-żewġ substations tal-gżira.
Is-Sibt filgħodu, diversi lokalitajiet f’Għawdex baqgħu mingħajr provvista hekk kif Enemalta bdiet tqassam l-elettriku disponibbli bejn żoni differenti. Intużaw ukoll diversi generators biex tingħata provvista temporanja f’numru ta’ lokalitajiet.
Timijiet tekniċi ntbagħtu Għawdex il-Ġimgħa filgħaxija biex jidentifikaw fejn kienu seħħew il-ħsarat. Aktar tard matul il-lejl, instabet l-ewwel ħsara f’cable taħt l-art ta’ 33kV fix-Xewkija.
F’aġġornament ieħor is-Sibt filgħodu, Enemalta qalet li t-timijiet tagħha sabu t-tieni ħsara f’Kemmuna, qrib iċ-ċentru tad-distribuzzjoni.
Il-kumpanija qalet li tagħmir u riżorsi kienu qed jintbagħtu fuq il-post biex ikunu jistgħu jibdew it-tiswijiet, filwaqt li x-xogħol fuq il-ħsara fix-Xewkija kien għadu għaddej.
Enemalta wissiet li sakemm jitlestew it-tiswijiet, il-provvista fiż-żoni milquta se tibqa’ tiġi ġestita b’mod temporanju. Dan ifisser li klijenti jistgħu jesperjenzaw perjodi fejn l-elettriku jerġa’ jiġi għal xi ħin qabel jerġa’ jinqata’, hekk kif il-provvista disponibbli titqassam bejn żoni differenti.
Intant, il-Ministru għall-Enerġija Miriam Dalli qalet li tinsab f’kuntatt dirett ma’ Enemalta u mal-Ministru għal Għawdex Clint Camilleri dwar is-sitwazzjoni.
Dalli qalet li tifhem l-inkonvenjent u d-diffikultajiet li qed jiffaċċjaw ir-residenti, in-negozji u t-turisti.
Hija qalet li l-prijorità immedjata hija li Enemalta terġa’ tipprovdi l-elettriku lill-akbar numru possibbli ta’ klijenti, filwaqt li jiġi żgurat li l-kumpanija jkollha r-riżorsi kollha meħtieġa biex twettaq it-tiswijiet.
