KM Malta Airlines wissiet lill-passiġġieri dwar il-possibbiltà ta’ kanċellazzjonijiet tal-aħħar minuta fuq titjiriet lejn Katanja, hekk kif l-attività vulkanika kontinwa tal-Etna qed tkompli toħloq inċertezza fl-operat tal-ajruport.
L-Etna beda jiżbroffa l-ġimgħa li għaddiet, u dan wassal biex l-awtoritajiet jgħollu l-allert tal-avjazzjoni għal-livell aħmar u jimponu restrizzjonijiet fuq l-operat fl-Ajruport ta’ Katanja.
Nhar it-Tnejn, l-ajruport ħabbar li t-titjiriet kollha deħlin ġew sospiżi sa mill-inqas il-5pm.
Il-wasliet kienu ġew sospiżi temporanjament ukoll is-Sibt minħabba sħab ta’ rmied vulkaniku, iżda reġgħu bdew aktar tard waranofsinhar hekk kif il-kundizzjonijiet tjiebu.
KM Malta Airlines qalet li qed taħdem mill-qrib mal-Ajruport ta’ Katanja sabiex, fejn ikun possibbli, iżżomm it-titjiriet skedati. Madankollu, wissiet li l-attività vulkanika, id-direzzjoni tar-riħ u l-kundizzjonijiet tat-temp jistgħu jinbidlu malajr u bi ftit li xejn preavviż.
Il-linja tal-ajru qalet li tagħmel kull sforz biex tinforma lill-passiġġieri affettwati mill-aktar fis possibbli. Iżda f’ċerti każijiet, il-kundizzjonijiet jistgħu jmorru għall-agħar jew jiddaħħlu restrizzjonijiet operattivi f’daqqa, u dan jista’ jwassal biex titjira tittardja jew tiġi kkanċellata ftit qabel il-ħin skedat tat-tluq.
KM Malta Airlines irrikonoxxiet l-inkonvenjent u l-inċertezza li bidliet tal-aħħar minuta jistgħu joħolqu għall-passiġġieri, iżda saħqet li mhix se tiddejjaq tikkanċella titjira jekk il-kundizzjonijiet vulkaniċi jew tat-temp joħolqu riskju potenzjali għas-sigurtà.
“Fejn ikun hemm biżżejjed informazzjoni minn qabel, nagħmlu kull sforz biex ninfurmaw lill-passiġġieri affettwati mill-aktar fis possibbli,” qalet il-linja tal-ajru, filwaqt li saħqet li s-sigurtà tal-passiġġieri u tal-ekwipaġġ tibqa’ l-ogħla prijorità tagħha.
It-timijiet operattivi tal-linja tal-ajru se jkomplu jikkoordinaw mal-Ajruport ta’ Katanja u mal-awtoritajiet rilevanti sabiex kemm jista’ jkun it-titjiriet skedati jkunu jistgħu jitħaddmu b’mod sigur sakemm il-kundizzjonijiet jibqgħu instabbli.
.png)
.png)
.png)
