Hekk kif il-ġuri dwar il-qtil tal-ġurnalista Daphne Caruana Galizia daħal fit-tielet jum tiegħu, oħtha Mandy Mallia qasmet messaġġ emozzjonanti fuq il-midja soċjali dwar l-impatt li d-delitt ħalla fuq il-familja tagħha.
"Ommi mietet mingħajr ma rat il-ġustizzja ssir, filwaqt li missieri, li għandu aktar minn tmenin sena, għadu jsegwi kull dettall dwar Daphne," kitbet Mallia. Hija fakkret ukoll fis-snin li l-ġenituri tagħha qattgħu fil-Qorti, "ftit pulzieri 'l bogħod minn dawk akkużati bil-qtil ta' binthom."
Rose Vella, omm Daphne Caruana Galizia, mietet fl-2023 wara sensiela ta' kumplikazzjonijiet tas-saħħa li segwew il-qtil ta' bintha, fosthom puplesija li kienet sofriet fl-2019. Minkejja saħħitha, hija baqgħet tattendi s-seduti tal-Qorti u l-velji b'appoġġ għat-tfittxija għall-ġustizzja.
Mallia ppubblikat ukoll ritratt ta' Daphne ma' missierhom fid-dar tal-familja fl-2003 u qalet: "Din kienet Daphne", filwaqt li enfasizzat li kienet persuna qabel ma nqatlet fis-16 ta' Ottubru 2017.
Hija qalet li l-familja qed terġa' tgħaddi mill-uġigħ hekk kif fil-ġuri qed jinstemgħu recordings li fihom, skont il-prosekuzzjoni, Yorgen Fenech jinstema' jgħid lill-allegat intermedjarju Melvin Theuma li Daphne "m'għandhiex tispiċċa bħal Romeo Bone" u li l-bomba kellha tkun qawwija biżżejjed biex toqtolha.
"Il-ġustizzja għal Daphne ma tistax tasal malajr biżżejjed. Malta trid tieħu pożizzjoni," temmet tgħid Mallia.
Intant, matul it-tieni jum tal-ġuri, il-prosekutur Anthony Vella qal lill-Qorti li f'April tal-2017 Yorgen Fenech allegatament talab lil Melvin Theuma jsib persuna lesta toqtol lil Daphne Caruana Galizia għax kienet se tippubblika informazzjoni li setgħet tagħmel ħsara lill-familja tiegħu. Il-prosekuzzjoni sostniet li mingħajr l-allegat involviment ta' Fenech, il-ġurnalista ma kinitx tinqatel.
.png)
.png)
