Seba' każijiet ta' użu ħażin tal-Blue Badge identifikati f'Mater Dei

It-Tim tal-Infurzar fi ħdan il-Kummissjoni għad-Drittijiet ta' Persuni b'Diżabilità (CRPD) identifika seba' każijiet ta' użu ħażin tal-Blue Badge waqt spezzjoni li saret fil-parkeġġ tal-Isptar Mater Dei.

Il-Kummissjoni qalet li f'kull wieħed minn dawn il-każijiet, il-Blue Badge kienet qed tintuża minn qarib ta' persuna b'diżabilità, minkejja li d-detentur tal-badge ma kienx preżenti fil-vettura.

Fi stqarrija fuq Facebook, it-Tim tal-Infurzar spjega li dawn l-ispezzjonijiet jagħmlu parti minn ħidma usa' biex jiġi żgurat li l-ispazji ta' parkeġġ riservati għal persuni b'diżabilità jintużaw kif suppost.

Il-Kummissjoni żiedet li x-xogħol tat-tim ma jinkludix biss spezzjonijiet, iżda wkoll taħriġ lill-Pulizija u uffiċjali oħra tal-infurzar, kif ukoll l-aġġornament kontinwu tar-reġistru tal-Blue Badge.

Skont il-CRPD, dawn il-miżuri huma maħsuba biex jiżguraw li persuni b'diżabilità jkollhom aċċess aħjar għall-parkeġġi riservati meta jkollhom bżonnhom.